Nandurin Manah
Akéh genah matanduran. Wénten matanduran ring cariké, wénten matanduran ring tegalé. Wénten matanduran ring segarané. Wénten matanduran ring angga sarirané, kadi pangandikan lugra Prandha Madé Sidhemen, ring Geguritan Salampah Laku, ‘Karang awaké tandurin.’
Saking sasih Kapitu, Kaulu, minab kantos Kasanga sabehé nénten surud-surud tedun saking ambarané. Jagaté mawastu tis, sami wit taruné nyantenang lom daun ipuné. I taru cempaka, i taru sandat, i taru majagau ngédéngang kajegégan ipuné sami ngawetuang kamiikan ipuné. Satunggil sané nglintang ring pinggir wit taruné kadi kaplekina antuk ambu miik. Miik kantos ka telenging kahyun.
Sayongé nempuh daun ipuné. Élag-élog sakadi sasolahan rejang ring natar purané. Sayor kangin, soyor kauh sapunika wantah tempuh angin baret. Ring nuju anginné baret pisan saking kalér kauh, matimbal antuk suaran kerug lan tatit janten pacang gelis tedun sabehé kadi amertha tedunné saking akasa.
“Beli,” sapunika somah titiangé mapajar. “Jalan ja jani matajukan ka tegalé sedek sasih magha buka jani. Sinah sabilang ané tajuk lakar idup krana tusing kuangan yéh. Yén jani matajukan sinah manian lakar ada alap. Apa ja tajuk iraga jani, mani puan ento lakar alapin.” Somah titiangé kadi nundunin manah titiangé.
Titiang alus nyaurin. “Beli masi lakar najukin keneh. Mani lakar matajukan. Sambilang titiang ningalin déwasa di kalénderé.
“Misi najukin keneh. Misi ningalin kalénder, énggalan ilang kitané.”
Titiang kenyem-kenyem. Wantah punika uyutang, janten jaga ramé dadosné wangdé matanduran.
“Ené buin mani lakar ngawitin. Yén ngawitin matajukan manut déwasa, madak apang melah idupné. Jani, beli lakar ngaé bangbang malu. Sida maan telung bangbang.”
“Apa lakar tajuk?”
“Cempaka kuning. Kayuné mael, buina miikné nyusup di kenehé. Manian yén suba meles dadi anggon sanggah. Dadiné ada anggon aturan tekén kawitanné. Bes kanti suba kakéné tuané tusing taén mantas maturan.”
“Mancana gedé, énggalan idéwék amah api.”
“Eda kéto, ngrastitiang gumi tusing baan munyi dogén, anutang masi baan laksana. Mautsaha adana. Makejang lakar pamuputné mulih ka guminé wayah. Ada malunan, ada durian. Satondén kemu matajukan ané miik-miik malu.”
Somah titiang kenyem-kenyem wau titiang ngadharmawacanain sapunika. Titiang mapi-mapi uning ring sastra mangda mageeman manten. Sujatine titiang puyung prungpung. Galang menék galang tuun. Nénten uning rupan sastra. Tambet pisan. Sakéwanten mangda kanten midep ring arep somah titiangé, kamedalang tuturé sané polih antuk ngipil-ngipil. Titiang mablekis éling ring déwék mapi-mapi sakadi cangaké.
Majalan titiang ka tegalé ngarya bangbang saking kalér kangin ka kawitin. Raris kelod kangin, kelod kauh kantos kaja kauh. Nyirang matanduran mangda majohan akidik, kantos soré taler ngarya bangbang. Gelis taler puput. Kendel somah titiangé. Nembé uningina titiang jemet, sané pecakné ngekoh. Seringan ngrereh branangan sareng nganggurin luh tu (luh tuak). Napi raris karyanin lianan ring punika? Sané mangkin magentos jaga nandurin tetamian kawitan titiangé. Aget wénten tetamian, wénten genah masliahan akidik. Nénten purun ngadol santukan punika nénten guna kayan titiangé.
“Mani barengina matajukan.”
“Dadi masi.” Titiang lega santukan somah titiangé pateh dedemané matanduran.
“Suba maan bibit ané lakar tajuk?” Somah titiang matakén sambilanga nués busung jaga anggén canang sekar jaga aturang bénjang semengan santukan Tumpek, Saniscara Kliwon.
“Suba. Dibi maan meli di peken bibit cempaka lan bibit sandat. Tusing sanget mael. Pipisé ané ukana anggon ngalih branangan kabeliang bibit.” Somah titiangé kenyem minab kantenanga sampun magentos manah titiangé mangkin, usan sakadi dumun-dumuné.
“Man dija mapejang? Dadi tusing ngenah?”
“Di kubuné ka pejang.”
“Antes sing tepuk.”
Ambarané kanten kaliput antuk méga ageng. Angin Kauluné sampun munggah. Wit taru sané wénten ring tampek kubun titiangé saling égolin. Somah titiangé jejeh. Ipun mapinunas mangda nénten empak bilih-bilih bah. Suéca Hyang Bayu sayan ngalonang pamarginé. Élogan wit taruné sayan ical. Nénten sué kagentosin antuk sabeh tan kadi-kadi. Sakadi téngkobang saking langité. “Dumogi nénten wénten bencana. Dumogi nénten wénten tanah embid,” sapunika titiang mapinunas ring Sesuhunan.
Wenginé punika titiang nénten polih nyrepjep becik santukan kabanda olih sabeh kabinawa pisan. Sapunika taler somah titiangé pateh nénten kiap ipun. “Beli ngujang dadi kakéné? Guminé tis, sakewala tusing nyak entil. Apa ya lakar ada?”
“Mirib baan bales ujané ngranaang. Ané jejehin ada lantas bukité embid buina bukit-bukité liu suba ceking ulian tanahné angona ngurug.”
“Madak ja apang rahayu ajak makejang.”
Minab emed ngedat matan titiangé raris polih engsap abosbos. Kurungan titiangé ngentenin mangda digelis ngupapira déwék. Titiang ngambil payuk jakan. Nguripang api. Yadiastun titiang muani, nénten kimud ngambil karya nyakan. Titiang éling nyakan taler mapangayah ring Bhathari Sri. Wantah sampun rateng, janten malih jebosné polih titiang masaiban. Ngaturang suksma sida mikolihang amertha.
Somah titiangé ngarya sambel jaga genjuhanga sareng gerang sané gumanti deminin titiang. Kenyem-kenyem titiang ri sampuné rateng gerang sané gorénga. “Manjus malu lantas masaiban.” Nénten sué titiang masaiban. Nunas ajengan masambel gerang. Maclémosan pisan titiang sakadi anak alit kaluén.
Sampun tengaian, titiang éling jaga nandur wit cempaka sareng wit sandat. Tandurin titiang bangbang sané karyanin titiang dibi. Nunas taler mangda sida murip tetandurané. Sami bangbangé sampun madaging wit taru.
“Beli, melah rasané maan matajukan. Yadiastun abedik, manian sinah ada lakar anggon apabuin bungan cempaka lan sandat melah ajiné. Lénan tekén ento ada anggon banten di canangé.”
Titiang nénten nyaurin. Sampun soré mawali budal. Sabehé malih tedun kabinawa. Angin ngalinus kantos makuus piragi. Wenginé punika taler nénten olih nyrepjep. Bénjang semengan titiang ka tegalé. Panggih titiang sami tanduran titiangé sami ical, sakadi wénten sané nyabut. “Duh déwa ratu, dados tanduran titiangé sami ical?”
Majeritan titiang sareng témpékan sané wénten irika. “Beliiiiiiiiiii ada dingeh anak ngusak tajukan tiangé?”
Ipun nénten nyaurin. Mapi-mapi nénten miragi pitakén titiang. Titiang mamanah-manah apa ia ané ngusak tajukan titiangé. Ah, tusing dadi buka kéto. Titiang budal, baosang titiang sareng somah titiangé. Ipun kenyem nyaurin. “Beli buka tusing nawang. Ipidan kadén ada kenehné tekén awak tiangé.”
Titiang nénten purun mastikayang santukan éling ring déwék saking munyi midep nemu sengkala.
“Depang dogén. Mani buin lakar meli bibit, apang ada tajuk kanti idup. Yén ené buin ilang mara lakar kintipin.”
Somah titiangé kenyem, sinambi ngelut sakadi anak truna kasmaran.
Sayongé nempuh daun ipuné. Élag-élog sakadi sasolahan rejang ring natar purané. Sayor kangin, soyor kauh sapunika wantah tempuh angin baret. Ring nuju anginné baret pisan saking kalér kauh, matimbal antuk suaran kerug lan tatit janten pacang gelis tedun sabehé kadi amertha tedunné saking akasa.
“Beli,” sapunika somah titiangé mapajar. “Jalan ja jani matajukan ka tegalé sedek sasih magha buka jani. Sinah sabilang ané tajuk lakar idup krana tusing kuangan yéh. Yén jani matajukan sinah manian lakar ada alap. Apa ja tajuk iraga jani, mani puan ento lakar alapin.” Somah titiangé kadi nundunin manah titiangé.
Titiang alus nyaurin. “Beli masi lakar najukin keneh. Mani lakar matajukan. Sambilang titiang ningalin déwasa di kalénderé.
“Misi najukin keneh. Misi ningalin kalénder, énggalan ilang kitané.”
Titiang kenyem-kenyem. Wantah punika uyutang, janten jaga ramé dadosné wangdé matanduran.
“Ené buin mani lakar ngawitin. Yén ngawitin matajukan manut déwasa, madak apang melah idupné. Jani, beli lakar ngaé bangbang malu. Sida maan telung bangbang.”
“Apa lakar tajuk?”
“Cempaka kuning. Kayuné mael, buina miikné nyusup di kenehé. Manian yén suba meles dadi anggon sanggah. Dadiné ada anggon aturan tekén kawitanné. Bes kanti suba kakéné tuané tusing taén mantas maturan.”
“Mancana gedé, énggalan idéwék amah api.”
“Eda kéto, ngrastitiang gumi tusing baan munyi dogén, anutang masi baan laksana. Mautsaha adana. Makejang lakar pamuputné mulih ka guminé wayah. Ada malunan, ada durian. Satondén kemu matajukan ané miik-miik malu.”
Somah titiang kenyem-kenyem wau titiang ngadharmawacanain sapunika. Titiang mapi-mapi uning ring sastra mangda mageeman manten. Sujatine titiang puyung prungpung. Galang menék galang tuun. Nénten uning rupan sastra. Tambet pisan. Sakéwanten mangda kanten midep ring arep somah titiangé, kamedalang tuturé sané polih antuk ngipil-ngipil. Titiang mablekis éling ring déwék mapi-mapi sakadi cangaké.
Majalan titiang ka tegalé ngarya bangbang saking kalér kangin ka kawitin. Raris kelod kangin, kelod kauh kantos kaja kauh. Nyirang matanduran mangda majohan akidik, kantos soré taler ngarya bangbang. Gelis taler puput. Kendel somah titiangé. Nembé uningina titiang jemet, sané pecakné ngekoh. Seringan ngrereh branangan sareng nganggurin luh tu (luh tuak). Napi raris karyanin lianan ring punika? Sané mangkin magentos jaga nandurin tetamian kawitan titiangé. Aget wénten tetamian, wénten genah masliahan akidik. Nénten purun ngadol santukan punika nénten guna kayan titiangé.
“Mani barengina matajukan.”
“Dadi masi.” Titiang lega santukan somah titiangé pateh dedemané matanduran.
“Suba maan bibit ané lakar tajuk?” Somah titiang matakén sambilanga nués busung jaga anggén canang sekar jaga aturang bénjang semengan santukan Tumpek, Saniscara Kliwon.
“Suba. Dibi maan meli di peken bibit cempaka lan bibit sandat. Tusing sanget mael. Pipisé ané ukana anggon ngalih branangan kabeliang bibit.” Somah titiangé kenyem minab kantenanga sampun magentos manah titiangé mangkin, usan sakadi dumun-dumuné.
“Man dija mapejang? Dadi tusing ngenah?”
“Di kubuné ka pejang.”
“Antes sing tepuk.”
Ambarané kanten kaliput antuk méga ageng. Angin Kauluné sampun munggah. Wit taru sané wénten ring tampek kubun titiangé saling égolin. Somah titiangé jejeh. Ipun mapinunas mangda nénten empak bilih-bilih bah. Suéca Hyang Bayu sayan ngalonang pamarginé. Élogan wit taruné sayan ical. Nénten sué kagentosin antuk sabeh tan kadi-kadi. Sakadi téngkobang saking langité. “Dumogi nénten wénten bencana. Dumogi nénten wénten tanah embid,” sapunika titiang mapinunas ring Sesuhunan.
Wenginé punika titiang nénten polih nyrepjep becik santukan kabanda olih sabeh kabinawa pisan. Sapunika taler somah titiangé pateh nénten kiap ipun. “Beli ngujang dadi kakéné? Guminé tis, sakewala tusing nyak entil. Apa ya lakar ada?”
“Mirib baan bales ujané ngranaang. Ané jejehin ada lantas bukité embid buina bukit-bukité liu suba ceking ulian tanahné angona ngurug.”
“Madak ja apang rahayu ajak makejang.”
Minab emed ngedat matan titiangé raris polih engsap abosbos. Kurungan titiangé ngentenin mangda digelis ngupapira déwék. Titiang ngambil payuk jakan. Nguripang api. Yadiastun titiang muani, nénten kimud ngambil karya nyakan. Titiang éling nyakan taler mapangayah ring Bhathari Sri. Wantah sampun rateng, janten malih jebosné polih titiang masaiban. Ngaturang suksma sida mikolihang amertha.
Somah titiangé ngarya sambel jaga genjuhanga sareng gerang sané gumanti deminin titiang. Kenyem-kenyem titiang ri sampuné rateng gerang sané gorénga. “Manjus malu lantas masaiban.” Nénten sué titiang masaiban. Nunas ajengan masambel gerang. Maclémosan pisan titiang sakadi anak alit kaluén.
Sampun tengaian, titiang éling jaga nandur wit cempaka sareng wit sandat. Tandurin titiang bangbang sané karyanin titiang dibi. Nunas taler mangda sida murip tetandurané. Sami bangbangé sampun madaging wit taru.
“Beli, melah rasané maan matajukan. Yadiastun abedik, manian sinah ada lakar anggon apabuin bungan cempaka lan sandat melah ajiné. Lénan tekén ento ada anggon banten di canangé.”
Titiang nénten nyaurin. Sampun soré mawali budal. Sabehé malih tedun kabinawa. Angin ngalinus kantos makuus piragi. Wenginé punika taler nénten olih nyrepjep. Bénjang semengan titiang ka tegalé. Panggih titiang sami tanduran titiangé sami ical, sakadi wénten sané nyabut. “Duh déwa ratu, dados tanduran titiangé sami ical?”
Majeritan titiang sareng témpékan sané wénten irika. “Beliiiiiiiiiii ada dingeh anak ngusak tajukan tiangé?”
Ipun nénten nyaurin. Mapi-mapi nénten miragi pitakén titiang. Titiang mamanah-manah apa ia ané ngusak tajukan titiangé. Ah, tusing dadi buka kéto. Titiang budal, baosang titiang sareng somah titiangé. Ipun kenyem nyaurin. “Beli buka tusing nawang. Ipidan kadén ada kenehné tekén awak tiangé.”
Titiang nénten purun mastikayang santukan éling ring déwék saking munyi midep nemu sengkala.
“Depang dogén. Mani buin lakar meli bibit, apang ada tajuk kanti idup. Yén ené buin ilang mara lakar kintipin.”
Somah titiangé kenyem, sinambi ngelut sakadi anak truna kasmaran.
IBW Widiasa Kenitén
Komentar