Dadong Amin

“Makita ja masé Cang ngomong abuku. Bas kéto mileh-leh kincungin Mémé jitné.”

“Cang nyayangang cucun Cangé, nguda Nyi répot. Apa beratang Cang Nyi? Nyi nglekadang dogén, Cang dané ngubuhin.”

Béh, yén sampun magébras, ngambros, bagal-bagalan, glebag-glebug kénten pasaut méménnyané, males ngeng sampun manah Mén Amin nglanturang nutur. Malih ipun mapineh-pineh, antuk leknyané sat ngrahina nampi plungguhan, ngangsehang malih ipun mapangidih ring méménnyané.

“Cang dong sing ja nombang Mémé nyayangang cucu. Mula pantes dadong sayang tekén cucu. Demen bin Cang.”

“Men suba ya kéto, nguda ngamigmig bungut Nyié?”

“Kéwala da bes-bes.”

“Bes, bes kénkén maksud Nyié to?”

“Amin jlema suba kelih Mé, suba bajang, da mileh-ileh kincunginan jitné, sing bébas ia bergaul ajak timpal-timpalné!”

“Da macem-macem nagih bébas bergaul ajak cucun Cangé.”

“Truna-truna lek mlali-lali ka warung, Mémé ada maslikuan ditu.”

“Warung tongos mablanja. Warung sing tongos mlali. Mangun-mangunang basang muled gén Nyi tawang.”

“Truna-truna kan biasa mablanja sambil macanda, ngorta makangin-makauh paturu bajang-truna.”

“Da kangin-kauhanga cucun Cangé!”

“Sing ja kéto maksud Cangé.”

“Aaah bedikang Nyi mamunyi! Nyi orin Cang nengil dogén sing duga baan Nyi. Nyai sing dadi turut campur! Cang ngurus cucun Cang padidi!”

Amunika alus, seken, patut raos Mén Amin, jeg sautina basa kasar ma “cang” ma-“nyai” olih mémén ipuné Dadong Amin. Ping tiga ping pat Mén Amin nekang plungguhan saking truna-truna sadésa sabanjaran, yéning Dadong Amin sareng maslikuan di warung ngincungin Amin. Truna-trunaé ngekoh dadosné mablanja ka warung.

Amunika pasemengan sampun sengit pabligbagan Dadong Amin-Mén Amin, Pan Amin jeg nengil nyentaeng kadi togogé lolohin. Sujatiné Pan Amin boya jlema belog, nanging sangkaning ngeng doning ipun nyentana nyeburin mrika, dados ipun blangkem. Yéning ipun sareng ngraos, durung sida labuh raosnyané sampun jangkuaka olih Dadong Amin, matuannyané.

Luh Wayan Rasmin jeg iteh mapayas mapusung gonjér, mapupur, makamben batik, mabulang, makebaya jagi ka warung, taler tan renga ring ieg mémé-dadongnyané. I Amin sakadi anak bega, tan wénten ngomong nyang abuku. Punapi ja kadi godél maslusuk di cunguh, kija dedehina ipun satinut, kadi tan madrebé pamineh. Napi orahina olih dadongné guguna, jeg uluh-uluha.    Sujatinnyané, Dadong Amin akéh madrebé cucu istri, nanging wantah Ni Luh Wayan Rasmin, bawak jeritina I Amin, kémaon sané pinih sayangina makeplug. Tan ngiwangang, Luh Rasmin paling jegég. Tangkah gedé, bangkiang cenik, bokong bek, minab punika sané kabaos gitar spanyol. Clana dalem ipuné marajah. Sarahina-rahina Amin makamben makebaya madagang di warung. Jeg jegég. Awak padet, tegeh kalawan mokohé masanding. Mua nyampuah, paningalan gedé, Banggéang té sa-Gianyaran, tan wénten anak purun matumbasan ring Warung Amin. Wantah bos sugih-sugih sané mamobilan purun nganggur mrika.

Kocap antuk ageng pangérgér karanjingan olih Dadong Amin ring cucunnyané, wastu kajegégan dakocan dagang kopi cantik ring sisin pasar punika kebut kantos sajagat Bali. Tan siki-kalih bos-bos matetegar nganggur ka Warung Amin. Katekaning Presidén Sukarno kocap naenin wara-wiri ring margi agung ajeng Warung Amin, nanging tan durus simpang, doning tan kadadosang olih Pasukan Cakrabirawa pinaka pangawal presidén ring Bali. Pasukan Pangawal Presidén sané mamarkas ring Istana Tampaksiring punika sampun miragiang orti seken indik pangérgér I Amin lan kacingingan Dadong Amin.  

Dadong Amin gedé tegeh. Genggen, nyonyoné lambih, paningalané nyureng, tan wénten kenyem nyang akidik. Pajalané ancab-ancab nyrengseng tan tolihan, tan naenang doh ring ungkur I Amin. Paliatné tan lepas-lepas saking I Amin. Pesu mulih I Amin kakincungin jitnyané, katugtugin saking wuri. Dadong Amin kasub sakti madraguna, inan liak. Pelenga dogén anaké bisa bah. Mawinan tan wénten jadma purun nampek, napimalih singgah ka warung. Setata dados tanggun satua truna-truna.

“Kénkén Dadong Amin to?”

“Kénkén kénkén maksud awaké?”

 “Nguda awak tua pecéh lédék milu ngoyong di warung. Won anaké mablanja kema.”

“Ih ngidih olas da bani-bani benya nyambat-nyambat Dadong Amin. Nak dingeha tekén ia. Nyanan aliha polon ibaé mara tawang asané.”

“Cang makitalah mablanja kema.”

“Lénan laku ngopi. Ngudiang, benya ngalih mati kema?”

Anak ancun-ancun iseng-iseng mablanja mrika jagi katundung olih Dadong Amin. Nanging yén anak nglingghin mobil mrika, wawu kasanggra. Banggéanga dumun ping tiga ping pat rauh nganggur mablanja mrika. Sesampun sué mrika, sampun akéh bakatanga ngérét pipis anaké, tur sampun purun nglemesin I Amin, wawu mamargi gegemeté. Dadosné Warung Amin tan sakadi warung-warung kopi tiosan, mauan-uanan lanang-lanang ngingkrek ring warung. Wantah busan-busan bos mamobilan kémanten sané purun mararaian nglincak nganggur drika.

Orti indik kakebutan Warung Amin lan kajegégan Luh Rasmin kapireng olih Tuan Rudolfo. Inan sugihé ring Negara punika nuduhang mangda sopirnyané mararaian irika. Anak lanang gedé cepag nanging sugih tan kodag-kodag punika élah aluh ngranjing ka warung. Sopirnyané malih nglindeng doh parkir. Luh Rasmin lan Tuan Rudolfo iteh macanda ngroman ring tengah, Dadong Amin magingsir nyelap matégtog nyait cepér ring ajeng warung, sakadi asu borosan ngongkongin ngangkangin nambakang yén wénten anak jagi singgah ka warung. “Warung tutup. Lénan laku mablanja!” Setata kénten pasaut Dadong Amin yén pradé purun anak rauh matetegar mablanja sedek Tuan Rudolfo rauh nganggurin cucunnyané. Rinasa wénten sampun ping pat Tuan Rudolfo polih nganggurin Luh Rasmin ring warung.

“Mé, da ja paksa I Amin ngenyakin anak muani né to! Pang ia milih dané demenina!”

“Sing, Cang dané nentuang dadi kin singé.”

“Rudolfo?”

“Nu duegan Cang kin Nyi.”

Pasemengan sampun ping ngliman Tuan Rudolfo nganggur ka warung. Tan sakadi biasané, sapanganggur mangkin magrégotan bebaktannyané ngébekin bagasi mobil sédan. Sakadi biasa soré wawu késah.

“Kénkén Min, ba?”

“Ba Dong.”

“Nah.”

Iur ortané ring désa, Tuan Rudolfo sarahina-rahina bébas nganggur ring Warung Amin. Katarka Tuan Rudolfo pacang prasida ngalap nyumpangin Bungan Désané punika. Kembang désa nanging ambuné mébek kantos ka dura désa. Malih ping nem saking semeng kantos soré, wawu Tuan Rudolfo késah saking warung. Bénjangnyané jagi ping mituin? Yé, dong ten. 7

I Madé Suarsa embas ring Banjar Gelulung, Désa lan Kecamatan Sukawati, Gianyar tanggal 15 Méi 1954. Karyan dané, pupulan Puisi Bali Anyar Ang Ah lan Ah Ang ngamolihang Hadiah Rancagé 2005; Pupulan Cerpén Bali Anyar Gedé Ombak Gedé Angin ngamolihang Hadiah Rancagé 2007; ngamolihang Penghargaan Dharma Kusuma Pemerintah Provinsi Bali warsa 2019.*

I Madé Suarsa