Tepen Unduk

Mirib saja panarka dokter Rai, ia ngaraksa TBC, apabuin awakné sayan meragang tuh gait. Tulang iga-igané masunaran yadian selat kulit ané badeng sengeh borbor ai.

“Koh.... koh... koh.... Méméné idihang ja beli yéh anget anggon naar ubad!” seret ngangseg ngelurin Men Latra, somahné.

“Antos malu beli, tiang ka pisaga ngidih yéh malu!” gagéson Mén Latra majalan, nanging mara teked di angkul-angkul umahné ulung katanjung. Bug... yadian naanang sakit ia ngangsehang bangun sambilanga ngarenggeng.

“Dadi tumbén katanjung di dangsahé?” Ningalin gelasné nyag mabrarakan nepén batu, kenehné milu nyag engsek maselselan nyeselin déwék kabanda baan tiwas neteh angkihan. Leliatné midehan, uli balé dajané ané enu tuduh tur réyod kanti laad balé dangin ané suba tumbuhin lateng. Ané lén masi telah asah tekén natahné. Pan Latra bengong ningalin somahné engsek di angkul-angkulé. Kenehné engsek tur macunduk nunggil, macepuk tekén keneh somahné ané mangumbara désa.

Marawat-rawat undukné ané malu, galahé dasa tiban. Dugas ento bagia lan sukané makembaran. Ngelah pianak dadua luh muani, Luh Manik ané cerikan mula jegégné kasub kanti ka dura désa. Tingkahné setata dadi tetuladan anak. Beliné I Latra masi bagus alep tur suba pragat kuliah di Fakultas Téknik, suba maan gelar insinyur. Nanging mirib saja cara sesenggakané, ageté sing dadi alih, bayané sing dadi kelidin. Kulawarga Pan Latrané tan paunduk tepén unduk. Bayané ngawit dugas I Latra mulih ngajak timpal nganggo jas tur madasi anyar.

“Pa, ené Bapak Agung Pramana, calo ané nyidayang ngalihang gaé. Tiang bakal alihanga gaé di kantor gubernuran,” sada égar I Latra mapiorah tekén reramané.

“Nah, bapa suba ngangsan tua, cening suba nawang unduk, suba bekelin bapa aji kabisan. Jani kénkén melah ceningé lautang, bapa nuut dogen,” banban pasaut bapané. Mén Latra yadian tan pasaut, nanging itep ningehang.

“Nanging... Pa.... Mé...,” I Latra marérén tusing sida nglanturang tutur.

“Nanging kénkén, Yan.?” Mén Latra netesang nakonin.

“Nanging pinaka srana pangiket, Bapak Agung nagih nyilih sertifikat cariké ané dauh tukad.”

Pan Latra muah Mén Latra bengong cara togog lolohin. Mapineh-pineh, inget ngelah carik tuah séket are tetamian anak lingsir. Yén anak tusing pedas tawang, bakat baang sértifikaté, sumangsaya pesan buin bakal mawali.

“Mangda tan sumangsaya, niki bakta sértifikat tiangé indik tanah ring Bukit. Yéning bénjangan tiang malaksana tan rahayu, tanah tiangé sané ring Bukit, punika ambil akéhné satus aré,” Bapak Agung Pramana nyumekening Pan Latra sambilanga ngédéngang sertifikat lan surat lénan.

“Da buin sangsaya, Pa! Tiang cager tekén dané Agung Pramana,” I Latra ngawewhin.

Tan malih mapineh-pineh, Pan Latra nuut kadi pangidih pianakné. Abulan, duang bulan, kanti atiban nanggu sasubané nyerahang sértifikat, I Latra kondén masi maan panggilan magaé. Sasubané selehina, I Latra mara marasa déwékné dadi cundang kauluk-uluk olih Agung Pramana. sértifikat ané baanga tekén Agung Pramana palsu. Ané sayan ngawinang engsek di kenehné I Latra, carik tetamian anak lingsirné suba dadi gelah anak karena duk Pan Latra néken surat puyung di beténé misi kwitansi. Agung Pramana ané kocap dadi calo ilang tan pasawa. Tusing sida naanang sakit keneh, I Latra luas ninggalin rerama, ninggalin désa tan pasambatan. Atiban sasubané I Latra luas, Luh Latri masi milu luas ka kota ngalih pangupa jiwa.

Cara tepen unduk ané tan paunduk, bayané mapulpul nepén Pan Latra. Atiban tengah pagedin Luh Latri, sagét ada ambulans ngatehang sawan Luh Latriné. Manut polisi ané milu ngatehang, Luh Latri mati duk ngulungang belingan sig balian manak. I Gede Landung, tongos Luh Latriné  ngidih gaé ané ngardi belingan Luh Latriné jani suba matahan di kantor polisi. I Gedé Landung kedeh ngatehang Luh Latri ka balian manak karana ia tusing bani nyuang Luh Latri takut tekén somah muah pianakné patpat ané suba bajang teruna.

“Mé.... mé...., ngudiang dini bengong?” sagét ada anak muani tan samandana ngentenin rerambangan Mén Latra. Mén Latra kamemegan ningalin anak muaniné ento.

“Nyén ento méméné?” Pan Latra mageluran uli di balé daja.

“Tiang I Latra, Pa. Tiang pianak Mémé lan Bapa,” I Latra masaut sambilanga nandan méméné ka balé daja.

Buin mani semengan enu ngeruput I Latra suba ngajak reramané luas ka kota ka umah I Latrané ané anyar. Sawatara ada duang jam tengah maka telu suba neked di arepan umahé ané gedé kabinawa. Pan Latra bengong, Mén Latra bingung tan pesu munyi.

“Né umah apa hotél, Tra?” bapanné matakon kadi anak lolo.

“Né suba umah tiangé, jani masih umah bapa lah umah méméné.”

“Endén malu, bapa matakon, sangsaya bapa, apa sangkaning rahayu cai sida ngaé umah gedé kené apa sangkanin kénkén?”

“Nyanan jumah tiang nuturang Pa,” I Latra masaut sada bingar sambilanga lakar nandan bapané ka tengah.

“Endén malu sautin patakon bapané ibusan,” Pan Latra brangti.

“Pa, jani guminé mula nungkalik, ané kaloktah kasinanggeh kaliyuga. Yaning sangkaning melah magaé, tusing ja brana bakat kéwala tiwas kauluk-uluk olih anak lén. Ento mawanan tiang masih milu nuutin pajalan guminé singeh. Yadian sangkaning tan rahayu tiang ngalih gaé, engsap tekéning titah Widhi masih sida baan tiang ngelah lebihan tekén gelah-gelahan ané kauluk-uluk olih Agung Pramana,” I Latra netesang laksana. Tondén pragat tutur I Latrané. Pan Latra bah macepol di natahé. Prajani I Latra, Mén Latra saha satpamné buka patpat marengin ngajak Pan Latra ka rumah sakit.

Nanging mirib suba titah Widhi, Pan Latra tan katulungan. Unduké mula sajan nepén I Latra, méménné tan pasambatan masih limuh laut ngemasin mati. I Latra bengong mapangsegan karana tusing nawang unduk setata tepén unduk. *

Ngakan Madé Kasub Sidan