Bapa Segara

Di kénkénné ada masi anak ngalih palit uyah, koné anggona ubad, ada masi nyambat anggona sarana banten. Awakné gedé masawang selem krana sesai manyama tekén matan ai, sabilang dina maan dogén ngalih pangupajiwa ka tengah pasihé. Jukungné nujah-nujah ombak buka nujuhin di tengah pasihé ada amertha anggon nglanturang idup di guminé. Bisa masi sawitrané marengin ka tengah ngalih bé. Kendel kenehné krana ada marengin ngalih pangupajiwa.

    “Tu, ditu aba jukungé. Sinah ditu ada bé liu.”

    Putu Samudra ngilukang jukungné. Jukungné ngleser ngalih tongos bé. Kendel pesan kenehné krana pancingné liu amaha tekén béné. “Pa, mani lakar liu maan pipis. Liu bé bakat dinané jani.”

    “Lakar dadiang pindang. Mémé Luh sinah kendel jani maan bé lakar adepa. Pipisné anggon prabia nglanturang idup. Buina apang énggal masi Mémé Luh ngelah sentana, ada ajak tiang manian ngrunguang pasihé.”

    “Madak apang misi apti-aptian Putuné.

    Bapa Segara makeneh-keneh jani. Uli kawitan kanti déwékné idupné uli pasih. Segarané maangin pangupajiwa. Yén nuju aget, liu maan bé. Yén di suungé, abesik col tusing maan. Sekéwala, Bapa Segara tetep mautsaha apanga idup kulawargané sayan melah.

    Satodén jukungé ngliwatin ombak, Bapa Segara ngaturang bakti apanga selamet di segarané. Pasih adana anak tusing bakat baan ngitungin. Mirib uli pasih ngranayang, ada paribasa, gedé ombak gedé angin. Buina saja pesan dinuju anginé gedé, ombak masi gedé. Yén ada anak mrasa nuturin anak dueg, lakar nyambat, buka ngentungang uyah ka pasihé. Mula dueg lingsir-lingsiré ipidan, liu ngelah paribasa indik pasih. Di wewidnganné, masi tetep nyalanang Nyepi Segara. Tusing dadi ngalih bé kalané ento, tusing dadi ngliwatin pasih di wewengkon désané ento. Ajak makejang satia tekén uger-uger ané suba katampi lan kajalanang melah. Abesik col tusing ada bani mentas ka pasihé. Segarané masi mayoga kalané ento. Tusing dadi goda olih para bendégané.

    “Ratu Bhathara Segara icénin titiang pamargi sané mawasta patut. Ratu Bathara Baruna, Ratu Bhathara Nawaruci, icénin titiang amertha mangda wénten anggén titiang nglanturang kauripané ring mracepada, mangda lanus nénten wénten kapiambeng panggih titiang ring segara. Singgih Ratu ngawisésa ring segara.” Ia lantas menékin jukungné. Nyak alus pajalan jukungné. Nuunang pancing. Ping kuda-kuda ia ngentungang pancing tusing ada bé ané ngamahin. “Dadi tumbén buka jani, idéwék?” Mirib béné enu malali ngelodang sangkalanga tusing ada ngamahin.” Ia inget somahné sedeng beling gedé. Marawat-rawat somahné ngisiang basangné ané suba sayan maakang ngalih diwasa lekad. Kanti tengai tusing masi maan bé. Neked di pasisi, anaké ngrunyung, liu nyagjagin marengin ningtingang jukungné, kéto melahné bisa matimpal pada-pada idup uli segarané. Saling tulungin, saling astitiang apang pada nemu rahayu.

    “Beli suba tawang?” kéto ada matakon tekén Bapa Segara.

    “Tawang kénkén?”

    “Somah beliné, Mémé Luh suba ngelah sentana.”

    “Dadiné somah beli suba nglekadang panak? Suksma nyamané ajak makejang suba nulungin somah beli.”

    “Nah, beli. Jani i mémé enu di Puskésmas. Jalan kema jani.”

    “Mai!

    Tepukina somahé suba dampingina sentanané. “Beli kema malu. Ituni bidané nakonin tiang nyén koné adan panaké?”

    “Man suba kabaangin adan?”

    “Inget tiang beli enu ka segarané, lantas baangin tiang adan Gedé Segara. Man beli kénkén?”

    “Beli satinut Luh. Mirib ené ngranayang sangkan nang abesik beli tusing maan bé. Tusing kenapa. Panak beliné suba lekad. Ento satmaka pangantungan urip beliné.”

    “Beli mani eda ja luas ka pasih. Dadi mrasa jelek keneh tiangé,” sambilanga ngusuh-ngusuhin sentana ané enu barak. Kenehné bagia pesan krana suba uli kudang tiban kadén mapangapti apang ngelah sentana. Tambis sabilang peteng mapinunas ring Kawitan apang ada tedun nyeledi di pakaranganné. Yén sing kéto, bisa camput. Padalem masi tanah kawitanné tusing ada ané nglanturang pajalanné maparikrama.

    Bapa Segara makeneh-keneh. “Yén sing ka pasih, apa lantas lakar tunas. Idupé tuah uli mapangayah di pasihé. “Mani dogén Luh. Madak apang melah pajalan anginné.”

    Somahné tusing bani nungkasin. Ia masi inget tuah uli pasih ada pangupajiwa. Tusing melah matungkas ulian ngalih pangupajiwa. Melahné pada saling astitiang apang pada mapikolih.

    Bapa Segara kaukina tekén bidané. Ia énggal-énggal majalan. “Pa, i mémé suba dadi mulih, tusing kenapa i mémé, ia seger, mirib baan sesai maan bé pasih ané seger-seger. Bé ento melah gati anggo nyegerang awak, protéinné liu. Bisa manian panak Bapa lakar dueg krana uli di basang méméné suba sesai kena bé pasih.”

    “Suksma pisan Bu Bidan sampun mapitulung ring somah titiangé. Bénjangan aturina awan mapanggang maplecing.”

Bidané kenyem.

    “Ené panelah prabianné. Ubadné ingetang. Buin telun buin mai mapréksa.”

    Bapa segara mulihné, sebengné serdah. Misi apti-aptianné apang ngelah sentana muani. Sentana ané lakar nyeledihi dadi panua di karangné.

    “Beli, eda ja mani luas ka pasih.”

    Bapa Segara makeneh-keneh, “Ngujang, dadi busan-busan I Luh mapangidih buka kéto? Ada apa sujatiné?”

    Petengé ento, Bapa Segara tusing nyidaang pules. Ujané bales gati. Krug, kilat alah ngédéngang calingné. Tingalina somahné sayan putih. Bapa Segara makesiab, “Luh kénkén bayuné? Luh kénkén bayuné?” Busan-busan Bapa Segara matakon. Somahné kenyem masawang joh paliatné mara tingalina kambenné suba kaput baan getih. “Luh! Luuuuh bangun. Banguunnnnn!” Bapa Segara jerit-jerit, pisagané tusing ada ningeh baan angin lan ujané alah tingkebang tuuné. *

IBW Widiasa Kenitén