Umah Tawah Duur Bukité

“Mirib lakar ada ané nutug pajalan Pak Sudira,” kéto ia nekedang tekén Yadnya ané sedeng nyetir.

“Péh, jeg cara paranormal gén,” saut Madé Yadnya.

Makadua taén dadi murid Pak Sudira dugas masekolah di SMP, sekolah ané johné sawatara a kilo uli désané. Tuah guru ané soméh ento makada Putu Praba lan Madé Yadnya seleg malajah basa Inggris kanti ka perguruan tinggi tur pamuputné lantas magaé ngandelang kabisan mabasa Inggris yadiastun tongosné malénan. Tusing makelo sasukat Madé Yadnya magaé dadi gaid, Putu Praba ngajahin basa Inggris di sekolah tongos Pak Sudira taén ngajahin. Yadian Putu Praba mautsaha ngengsapang pangrasané ané tusing melah ento tur tusing nutugang raosné, ambu bangké ento buka tusing suud-suud nusuk song cunguhné kanti ia neked jumah. 

Ia waswas ri kala bangun buin mani semengané awanan ambu jelék ento buka nu neket di cunguhné. Ia sangsaya yéning ambu jelék ento pinaka ciri, patuh cara ipian gigi ketus ané ipianga kudang dina ané suba liwat. Sakéwala bina tekén ané takeha, soréné ento ia makesiab ningeh orta, Madé Yadnya ané nyetir padidian nabrak tanggun kerteg di dulun désané. Mobilné kabaranga macelempung ka abing tukadé ané mabatu gedé-gedé lan ia dapetanga nylempang tusing maangkihan. 

“Bo ané adek i déwék di pom bénsin ento pastika makait ajak né,” Putu Praba ngomong di kenehné dugas bareng manjusang timpal raketné ento satondén katunjel di sétra. Apan ia marasa lakar nyelék ati, ia ngénggalang nampokang papinehné ento.

Nanging kéweh. Suba liwat telung wuku ia nu dogén inget tekén unduké ento kanti dadi ipian. Satondéné ia tusing taén ngipi katemu tur maraosan ajak anak ané suba ngalahin mati. Buina ipianné ilis sajan, nyidang ia ngingetang. Madé Yadnya tepukina mapanganggo patuh buka dugas majenukan ka umah Pak Sudira, udeng, baju lan kamen selem.

“Prab, ajak raga mulih. Raga sing nyidang mulih.”

“Mulih kija?”

“Sing resep, Prab?” Yadnya matakon sinambi meleng Putu Praba satondéné mabalik lan majalan menékan nuluh lisig di tanggun kertegé. Putu Praba mautsaha nutug nanging tusing pelut bana nguber apan pajalan timpalné becat sajan. 

Neked baduur, Putu Praba napetang paukudané majujuk di tongosé dangsah tur linggah. Aslabsaban tepukina Madé Yadnya ngilang di durin angkul-angkul wangunan gedé ané ngenah cara umah suba lawas. Wangunané ento kaiter ban témbok bata ané tegeh sajan. Ento awanan wangunan ané ada di tengah tuah ngenah raabné dogén. Raab malakar ambengan buka balé Bali jaman ilu.

Maplegek ia ngatonang tongos ané asri buka kéto di duur bukité. Ada duang puun punyan jepun mabunga kuning mentik ngapit angkul-angkulé. Lebihan tekén ento tuah entik padang gadang buka lapangan sépakbola. Ri kala ia majalan maekin angkul-angkulé sagét ada makudang cicing dingeha ngongkong tur nyagjag uli tengah. Jejeh kategor ia prajani malaib ngejohin tongosé ento.

“Déwa Ratu!” Putu Praba nadaksara enten. Angkihanné sengal-sengal buka anak mara suud malaib. Apan sanget engsek ia tusing nyidang sirep buin kanti ka semengan. Ada apa sujatiné, nguda i déwék ngipiang Madé Yadnya ané suba ngalahin? Kéto ia matakon di kenehné.

Putu Praba meled sajan nelokin tongos timpalné ento ulung. Nyén nawang ada ané makrana Madé Pradnya nabrak kerteg lantas ulung ka tukadé. Nanging pesu uli umahné, apabuin pesu uli désané, tusing ja aluh. Suba uli makudang wuku kramané tusing dadi pesu apan pandemi Covid-19 suba ngalahlah ka dajan désa lan delod désa. Sinah ia tusing lakar baanga clapat-clapat tekén pecalang ané maan tugas majaga. Nanging, Putu Praba mautsaha ngalih akal apang nyidang ja nekain tongos timpalné ulung. 

***

 “Apa? Eda ngaé gara-gara buin. Oyongang ibané jumah,” Bapané Madé Yadnya nengkik ri kala Putu Praba ngebél petengné nuturang unduk patekané ka tongos Madé Yadnya ulung.

“Tiang ten ja ngaé gara-gara, Pa. Tiang tuah …”

“Endepang ibané. Sing ada umah duur bukité. Bapa nawang Putu sedeng strés kélangan timpal melah.”

Putu Praba ngejang hapéné sambilanga ngunjal angkihan. Selang makudang menit sagét ada télpun uli Santi, adiné Madé Yadnya, ané maan ningeh reraosan bapané ajak Putu Praba.

“Ampura, Beli. Ngomong apa busan ajak I Bapa?” Santi matakon.

Putu Praba nuturang unduk ia ngadek bo jelék dugas teka uli majenukan, kéto masih reraosané ajak Madé Yadnya di pangipian tur lantas nekain umah ané majujuk duur bukité.

“Adi mesib jak ipian tiyangé, Beli?” 

“Béh, Santi maan ngipi masi?”

“Kéwala tiang sing taén ngorta kén nyén-nyén. Aksamaang, Beli. I Bapa kalepasan ngomong busan kanti Beli orahanga strés. Sujatiné I Bapa ané strés. Beli kadén nawang, disubané céléngné makejang mati kena virus, Bli Yadnya lantas nadak ngalahin.”

“Beli nawang. Aksamaang Beli masi krana suba ngaé I Bapa sayan strés.”

Liwat makudang dina Santi buin ngebél, ngorahang ia maan nunasang tekén Jero Balian Wikan unduk ipiané. 

“Umahé ento sajan ada koné, Beli. Nanging sing ja makejang anaké nyidang nepukin. Tongosé ento gelah wang samar koné.”

“Yén kéto, dong wong samar nak muani ané bakat ajak Beli ngomong?”

“Kéto mirib. Jero Balian ngorahang atman Beli Yadnya nu paling.”

“Eda-eda wong samar ento ané makada Yadnya buka kéto.”

“Jero Balian sing ada ngorahang kéto.”

“Nah, madak sing ja kéto.”

“Dané ngorahin apang énggal-énggal mamitang Beli Yadnya uli tongosé ento.”

“Suba maan ngraosang ajak I Bapa?”

“Suba, Beli. I Bapa setuju lan mapangidih kén Beli apang bareng.”

“Nah, Beli sadya lakar marengin.”

***

Klenting gentané madingehan tanglus ngebekin abing tukadé soréné ento. Pastika tusing ada anak lén ané ningehang sajaba kulawarga ané nyalanang parikrama mamitang Madé Yadnya mapan suba maan ijin uli petugas ané majaga. Bapa Kaja, somahné, Santi, lan Putu Praba negak di durin pamangkuné ané masaha sinambi nglénéng. 

Sedek ngantosang pamangkuné mragatang parikrama mamitang atman timpal raketné malarapan banten ané tusing tawanga adané tur tegesné, Putu Praba inget tekén kanékatané nekain tongosé ento makudang dina ané suba liwat. 

Ia nawang pecalangé majaga tuah kanti jam nem. Apang tusing ada ané ngalangin, mendep-mendep ia nekain tongosé ento jam nem liwat dasa menit. Beneh sajan buka ané tepukina di pangipian, ada lisig ditu nyujur ka bukit. Tusing mapineh buin ia laut majalan nuluh lisigé ané katangkeb entik ambengan samah kanti lantas ia nepukin umahé ento. Ia marasa lega krana tusing ada dingeha cicing ngongkong cara di pangipian. Nanging ada ané ngaé ia makesiab, nak muani ané sagét nengok uli angkul-angkulé. Nak muani ento macelana katok pelung lan makelambi kaos oblong putih.

“Sapa sira jero niki? Ngudiang mariki?” kéto patakon nak muani ané matuuh sawatara enam dasa tiban ento.

Putu Praba kamemegan satondén masaut, “Tiang ngrereh timpal tiangé ané tepukin tiang majalan mariki.”

“Ten wénten sira deriki lianan ring tiang. Mrika mantuk, sampunang kantos wengi deriki. Nyanan jero ten mrasidayang mantuk!”

Sing nyidang mulih? Inget tekén reraosané ajak Madé Yadnya di pangipian nadaksara jering bulun kalongné. Putu Praba kadropon magedi disubané nak muani ento mabalik nyujur umahné.

Putu Praba ngulung tikeh pandan di maluné ri kala parikrama mamitang atman Madé Yadnya suba pragat. Ia marasa lega krana Bapa Kaja ané pangawitné ngadén ia bogbog pamuputné precaya tekén raosné. Ia mapangapti atman timpal raketné suba maan pajalan ané melah, tusing buin paling di tongosé ento. Lénan tekén ento iya masi mapangapti apang tusing taén buin ngadek bo jelék buka ambu bangké. 7