Gas-Yuk, Ngantén

Munyi ané kéné-kéné suba ngaénang inguh kenehné Gedé Astika. Sabilang mulih ka désa nuju ada rainan, piodalan, yadin ada kulawargané ngelah gaé, kéto-kéto dogén patakon nyamané lan pisagané. Dikénkéné, ento ngranayang Gedé Astika ngekoh mulih.  

Yén mulih iseng tekén mémé bapané, ia mulih peteng apang maan dogén tepuk mémé bapané tur iseng pules jumah. Buin mani pelimunan, magedi suba balik ka Badung magaé. 

Mémé bapané suba sesai masi nakonin unduké ento. Wiréh nyeh masi ngelah pianak dadi teruna tua. Tuuhne Gedé Astika suba petang dasa telu. Timpal-timpalné suba pada ngelah pianak SMA. Ada masi ané suba ngelah cucu kanti. Adin-adiné suba masi pada ngantén. Gedé paling keliha kondén ngantén. Ento ngranayang mémé bapané mapineh ngalihang jodoh. 

“Beli… alihang Gedé jodoh nyak? Pang ngantén dogén Gedé. Yén sing kétoang suba kelih pianaké ento!” kéto méméné makeengan.

“Oo, yén nyak, yén sing nyak? Déwéké buin pedihina. Kadén nak luung pajalané, sagét sing mulih-mulih panaké, ngambul terus. Kénkénang abeté?” saut bapané.

Payu bengong ajaka dadua. 

“Men lakar depin panaké sing ngantén-ngantén?” buin méméné ngomong.

“Tunasang dogén tekén Ida Hyang Leluhur, sasuhunanné apang panaké seger tur maan jodo ané melah,” saut bapané.

Méméné mendep-mendep suba masih ngalih jero tapakan, nakonang unduk Gedé Astika ané tusing ngantén-ngantén. Dikénkéné ngidih pasikepan apang ada anak luh demen tekén Gedé Astika. Kéwala makejang ento sing mampuh. Makejang lémpas. Makejang punah barangé kéto-kéto. Pamuputné méméné masukserah tekén Ida Hyang Widhi apanga pianakné maan jodo ané melah. 

Tusing ja mémé bapané dogén anaké jenget ngenehang Gedé Astika. Timpal-timpalné, pisagané di banjar milu masi dot nyodohang Gedé Astika. Ada ané seken nuturin apanga ia ngalih kurenan tur kénkén melahné anak ngalih kurenan. Ada masi anaké kanti jail ngwalék, anggona canda-candaan Gedé yén suba mekumpul di balé banjar. Timpal-timpalné liu ngelah sesaudan yén Gedé Astika ngantén.

“Dé, yén Ci ngantén, glaé lakar maang ngidih jaja panganténan,” kéto Wayan Suta ngomong.

“Wayan, Ci lakar maang jaja yén Gedé ngantén? Glaé lakar nanggung céléng gulingné,” milu masaut Mang Gobang sambilanga kedék.

“Péh, yén seken téh, Gedé ngantén, saya lakar ngalihang dokar mahias. Lakar séwaang saya ka Jinengdalem. Dokar lakar meséh cara dokar tuju belas Agustusé.” Ada buin anak nyautin. Liu anaké nyandain lakar maang nyumbang terob, ngisinin karpét jalan banjaré, lan ngupah jogéd yén Gedé ngantén. 

Gedé Astika kenyem-kenyem dogén. Baanga timpalné mamunyi cara kedis becica gacor maang kroto. Gedé Astika sing medihin timpalné mamunyi kéto. Ia mapineh yén kéto-kéto sautin, sinah suba lakar sing luung ngajak timpal. Sakéwala di kenehné, ia suba pasti marasa sekel. 

“Nah, bang dogén suba yang penting cang idup,” kéto kenehné Gedé.

“Icang ngucapang suksma tekén timpal-timpalé, suba lakar maang ngidih, maang nyilih yén icang ngantén. Kéwala icang tusing suba lakar ngantén karana ané ajak ngantén sing ada,” saut Gedé Astika sambilanga kedék. 

Wayan Suta nepak lengenné Gedé Astika. 

“Wé Dé, da malu ngraos kéto. Semangatang bané, alihang bané nak luh. Pasti maan. Apabuin Gedé ba magaé, ganteng bin….”

Gedé Astika kedék ningehang munyiné Wayan Suta. “Hé hé… péh misi ganteng bin. Ganteng sing laku éngkénang men,” kéto pesautné Gedé terus nugtugang nginem bir.

*** 

A bulan satondén Gedé Astika ngantén, orta di krama banjaré ambyug. Kondén Gedé morahan tekén mémé bapané, sagét pisagané malunan nawang ia lakar ngantén. Ada pisagané ningeh Gedé Astika metunangan ngajak cucu mekelé. Cucu mekelé maadan Ayu Kirana ané magaé di bandara. Ané ngranayang buin héboh, Ayu suba koné maawak dadua. Ortané ento neked di kuping bapané Gedé Astika. Bapané tusing ngantiang pianakné lakar mulih ka désa. Ia ngalih Gedé Astika ka Badung. Teked di Badung, bapané nyesedin unduk orta ané biur di banjar. 

“Gedé, bapa ningeh orta...”

Kondén suud bapané ngomong, Gedé Astika suba megatin munyin bapané.

“Saja Pa, Ayu suba beling. Tiang lakar ngantén!” saut Gedé Astika.

Buiih, buka ulungin pipis a kapal terbang bapané, baan rasa bagiané ningeh munyin pianakné kéto. Sing mamunyi liu, bapané ngelut Gedé Astika. Cara nak ngipi asané ningeh munyin pianakné kéto. 

“Gedé, da misi kéné kéto. Pokokné sing kéne sing kéto Gedé mulih jani, ngantén tén… tén… tén!” kéto muyin bapané saha ngrékék kedék.

“Nah, Pa,” saut Gedé bawak. 

Bapané ngorta di banjar yéning Gedé Astika lakar ngantén. Marasa kendel brayané ningehang Gedé Astika lakar ngantén. Pasti suba nganténe lakar magedé-gedéan sawiréh Gedé Astika muani adiri buina mémé bapané suba dot pisan ngelah mantu. Jeg pasti gedé tur meriah méwah panganténé Gedé Astika. Ané ngranayang méwah meriah sing ja lén ulian liu timpalné ané lakar naur sesaudan lakar maang ngidih kéné-kéto, nyumbang kéné-kéto. Timpalné ané ningeh tur lakar nyumbangin Gedé Astika ngantén, ada ané bengong masi ngenehang. Ngenehang lakar mayah sesaudan lan bengong ulian sing madaya Gedé Astika nyuang anak luh sing krécé-krécé. Jeg cucu mekel juanga, aruh….. amat wanén Gedé Astika. 

“Dé, seken Ci nyuang cucun mekelé? Bani Ci?” patakon timpalné

“Ah, nak suba pajatuh karma adané, sing dadi ngorahang takut kéto masi bani. Pokokné, pang sing tanggung-tanggung ngantén, jeg matua né serem alih, ha…. Ha,” Saut Gedé Astika sambil kedék matadah éwér masi ajak timpalné. 

Nah, seken suba jani Gedé Astika ngantén ajak Ayu Kartika cucun mekelé. Nganténé meriah misi makebat karpét di jalané, menékin dokar ané suba meséh ngrénéb. Panganténé cara Arjuna ajaka Déwi Supraba menék keréta kencana. Gagah gati lakar matipat bantal ka umah mekel menék keréta, diastun jaja matipat bantal sumbangan uling timpalné hé…. hé. Di balé banjar timpalné masang baliho misi foto pangantén misi tulisan, ‘Gas-Yuk, Ngantén’ alias Gedé Astika–Ayu Kartika, Ngantén. 7