Kaengkebang Wong Samar

Enu mapanganggo jangkep. Maudeng, makamen, mabaju putih guét selem, maimbuh booné nyenebin. Di beneng basangné ada kotés gedé mawarna barak ucem. 

I Landep mamegeng. Salianan tekén suaran yéh tukad ané ngrojog lan munyin gumatat-gumitit ané dingeha, ia masé ngasanin petengé ento peteng ané soléh. Peteng ané lakar nyaluk ngedas lemah. Peteng ané tusing bas peteng, sakéwala tusing masé bas galang. Sunaran bulané masunar remrem ulian kasaputin ambuné tipis. I Landep jejeh. Jejeh sagét ada beburon tawah uli alas dauh tukad ané teka manyagrep. Ia masé ngasanin entuk di tengah kenehné. Sakéwala, ia tuara lantang makeneh, ia lantas ngénggalang mageluran.

“Katemu! Madé Raksa suba katemu!”

Krama désané ané bareng nuluh tukad sakabesik nyagjagin tongos I Landep. Makejang kramané pada tengkejut. Ada ané bani ningalin, ada ané tusing bani ningalin, ada masé ané tusing bani maekin. Sakéwala, dugas ento ada anak luh mabok lantang magegéson maekin anak muani ané nengkayak totonan. Anak Luh ento lantas ngelut sambilanga ngeling sigsigan.

Ilang. Né jani bakata suba tusing maangkihan. Tuah kéto pajatu karmané Madé Raksa. Ilang uli duang dina ané suba liwat, dugas tengai, sawusan parum désané. Kurenané, Luh Rasmi, suba duang dina uyang paling ngenehang unduk kurenané ané nadak sara ilang. Kemu-mai masé suba ia ngalih-ngalihin. Tuara tepuka. Dija kadén. Ané tawanga tekén ia, kurenané tusing taén kija-kija salianan tekén ka tukadé, ka tongosné ngalih paras. Sakéwala, dugas ento tusing tepuka kurenané ada ditu. Kramané ané sakabesik takonina masé tuara ada nepukin. Yadiastun tuni semengan, disubané Madé Raksa kaupacara makingsan di gni di sétrané, unduk ané nibénin Madé Raksa suba dadi orta di désa. Désané biur, kramané patitakon. Apa sujatiné ané ngranayang Madé Raksa ilang tur kanti ngalain gumi.  

Disubané ngorta, narka, mabligbagan, lan nekedang rasa kaduhkitan di jumahné Madé Raksa, krama désané pada pakrimik, yén unduk ané ngaénang Madé Raksa ilang lan ngalain gumi tusing ja lén tuah gagaén wong samar. Pakrimik kramané ento masé madasar uli tingkahné I Landep. I Landep, sasukat teka uli sétra tingkahné soléh, mangigel sambilanga nyambat-nyambat wong samar tur maimbuh limané matujuhan ka tukadé.

Apa kadén ané ada di kenehné, apa kadén ané ngranayang I Landep dadi buka kéto. I Landep taén ngasanin apa ané asanina tekén Made Raksa. Nadak sara ilang. Kanti aminggu ngilang. Kramané ngorahang ia kaengkebang wong samar. Mula saja ia slamet, sakéwala, ri kala ia mulih ka désa, tingkahné soléh. Ia malaib ngiterin désané sambilanga mangigel, sambilanga makaikan, sambilanga mageluran, “Melahang! Melahang! Anaké ditu brangti. Sengkala lakar teka. Sayaga! Sayaga!”

Krama désané mabiayuhan ningalin I Landep ané tingkahné soléh. Pecalang lan krama désané patikaplug nguberin I Landep ané palaibné gencang, dikénkéné misi mangigel, nyelépang layah, dikénkéné ia nglilingang awak, maancogan, lantas buin malaib gencang. Biayuhané ilang ri kala silih tunggil pecalangé makatang nyangkuak awakné I Landep. I Landep ajaka ka Pura Dalem. Ditu Jero Mangku Dalem nyiratang tirta ka paukudané, ngaénang ia nengil lantas limuh. 

Buin kejepné, disubané I Landep bangun, ia nyritayang apa ané asanina. Dugas ento pangakuné ia sedeng mancing di tukadé. Kénkén kadén sedeng iteh mancing, nadak sara uli duri ada ané nekepin paningalané, nekepin bibihné lan nyangkol awakné, sarasa ajaka makeber. Apa ané asanina énggal pesan. Akijapan mata sagét ia suba ada di tongos bungah. Tongosé ento jimbar tur linggah. Ditu tepukina liu ada anak tawah, anak soléh. Awakné selem makaukud, ebokné lantang magambahan kanti nekepin muané, maboo andih, lan mangorta nganggon basa ané tusing resepina. I Landep jejeh pesan. Batisné ngejer, tangkahné nrugtug, bulun kalongné telah majujuk. Kanti lantas silih tunggil anaké ditu ngajakin I Landep mangorta nganggon basa ané karesepin. Anaké totonan ngorahang brangti tekén krama désané. Anaké totonan masé ngorahang lakar ngusak-asik tur ngaé sengkala di désané. 

Cutetné, anaké ento ngorahang, krama désané tuara tau tekén déwék, tuara nawang suksma. Liunan nyalanang solah jelé, momoangkara. Ngentungang lulu ka tukadé, ngaénang tukadé daki, cemer. Keto masé ngalih bé di tukadé nganggon piranti ané tidong-tidong. Nganggon portas, nganggon setrum, lan ané lénan. Makejang ento ngaénang tukadé tusing buin asri tur lestari. Apabuin paras ané ada di abing dangin tukadé, sing buungan kapongpong. Ngancan makelo lakar ngaénang désané embid, tukadé bisa-bisa maurug.

I Landep bengong tusing pesu munyi. Unduké ento mula seken saja. Krama désané liunan tuah ngenehang déwékné padidi, tuara ngenehang kénkén tukadé, kénkén lakar tulis gidat désané ané ada di duur abingé, apabuin lakar ngenehang unduk niskala ané ada di tukadé. 

Disubané bengong mapangenan, I Landep lantas ngulungang munyi ngidih pelih tekén anaké ané ada ditu. Sakéwala, suba tusing ada pangampura. Anaké ané ada ditu ngorahin apang makejang krama désané magedi uli désa. Baanga galah kanti aminggu. Yén sing, désané lakar kausak-asik, krama désané lakar gaénanga sengkala. I Landep ané ningehang marasa tusing terima. Nyén ané terima kaulah uli umahné padidi? Suudé ento peteng dedet. Tuah peteng ané tepuka tekén I Landep. Tusing ada buin ané ingeta. 

Buin maniné carita unduk I Landep ané tingkahné soléh sempiar ngebekin désané. Sasukat ento, krama désané tusing ada ané bani ka tukadé. Pikobeté ento dadi pakrimik di désa. Kanti lantas prajuru désa, ané ngamanggalaning désa, nglaksanayang parum désa. Tetujoné ngajakin krama désané mabligbagang tur ngalih pajalan anggon nepasin pikobet ané nibénin.

Dugas di parum, I Landep buin nyritayang apa ané asanina di arep krama désané makejang. Krama désané pada kisi-kisi makrimik. Tusing ada ané bani masaut. Tuah Madé Raksa ané bani nyautin tur ngorahang tusing ngugu tekén apa ané kacritayang tekén I Landep. Bos paras di désané ento masé ngorahang tusing percaya tekén unduk wong samar. Madé Raksa jengat. Munyiné pangat-pangat. Sing ada ané bani mapas munyiné. Parumé puput. Pikobeté tuara maan pajalan. Sakéwala, disubané parum désané ento, Madé Raksa orahanga ilang. Gatra ané sempiar ngorahang Madé Raksa kaengkebang wong samar ulian campah mamunyi dugas parum désané.

Krama désané ngancan jejeh. Makejang pabriuk nekain umahné I Landep. I Landep kabelbelan natakin raos krama désané. Ada ané ngorahang ulian ia désané mabiayuhan. Ada ané ngorahin apang I Landep buin ka tongos wong samar ané ada di tukadé. Ngaturang guru piduka. Ngidih apang pikobeté ené tuara buin nglantur. Sakéwala, I Landep mabéla raga. Ia tusing terima yén pikobeté ené orahanga ulian déwékné. Ia tuah nyidang nyritayang ortané ngajak wong samar ané suba liwat. Unduk ané ngaénang wong samaré brangti ulian solah krama désané.

Krama désané enu uyut, enu mabiayuhan di umahné I Landep. Sakéwala, makejang nadak sara siep ri kala Luh Rasmi mamunyi sambilanga ngeling sig-sigan. Luh Rasmi ngorahin apang krama désané nuutang apa ané orahanga tekén I Landep. Apang tusing ada buin ané pajatu karmané cara kurenané. Ilang. Lantas katemu suba tusing enu. Makejang nengil, tuara ada ané bani makrisikan, marasa tongosné jani buka taluh apit batu. Buin kejepné, makejang krama désané nyutetang keneh, magedi uli désa. 

Tusing karasa sagét suba aminggu ngliwat. Né jani, désané suba suung mangmung. Tuah I Landep ané masisa. Sujatiné ia tuara las magedi uli désa palekadané. Sakéwala, kenehné suba tegep, nuutin krama désa ané lénan. Dugas ia sedeng iteh makikén lakar magedi, nadak sara ada anak uli duri nekepin paningalané, nekepin bibihné, lan nyangkol awakné.

 

Buin kejepné, disubané ia ngedatang paningalan, sagét ia suba negak di tongos bungah. Di arepné, suba ada anak negak maririgan nyanggra sapatekané. Anaké ento awakné tusing ja selem makaukud, tusing ada ané mabok lantang magambahan kanti nekepin muané, tusing ada ané maboo andih. Makejang mapangganggo jangkep mawarna-warni. Maudeng, makamen, masafari. Makejang maboo miik. 

Anaké ento, ané ngamanggalaning désa, ané biasané nglaksanayang parum désa, sakabesik nyalamin I Landep sambilanga makenyem. I Landep kendel pesan kenehné. Makejang suba majalan anut tekén pangrencana. Ditu ajaka makejang pada gedé-gedé ortané. Unduk upah lan persénan, unduk carita wong samar ané sujatiné tuah carita ngaé-ngaé, unduk Madé Raksa lan kotés gedé mawarna barak ucem di beneng basangné ulian pakakasné I Landep, unduk krama désa ané bogbogina, unduk tukad lan batu-batuné ané lanying, unduk alas asri ané ada di dauh tukadé, unduk désané ané ada di duur abingé, unduk hotél, villa, réstoran, lan wawangunan anyar ané lakar majujuk di wewidangan désané. 

Makejang kedék pabriak ngantun sing suud-suud. Kadi rasa meli sebet tusing maan. Buta tekén barak lan gadang, kanti engsap tekén karma ané ngantosang. Kedékné I Landep sagét malénan tekén imalu. Kedékné ngakak sakéwala makelo-kelo semuné dadi jengis. Uli kedék ngakak jeg masalin dadi ngeling gelur-gelur, lantas maguyang tan patawang. 7