Nyomia Korona

Kénkén kadén unduké jeg liu anaké makidihang baju ledledan tekén ragané. Tusing ja tuah baju pegawé buka baju Korpri buuk gelahanga, baju ledledan murid ané macontrang-contréng cét pilok masi sepela.

Ainé mara sajan endag. Sada gancang pajalané yadiastun ragané suba matuuh enem dasa tiban. Tusing bani ragané ngelén-ngelén apan sayan labek motor liwat di jalané. Tusing taén engsap masi ragané nganggon masker nuutin arah-arah di banjar sekat ada gering virus Korona. 

Buka dinané ané suba liwat, tusing taén ragané nganggon sandal tatkala majalan ka carik. Telapakan batisné tusing asaanga sakit yadin mentas di duur jalan aspalé ané usak tur magrigi. Malah karasa buka kauwut ngaé awakné anget buka ukud. Ada sawatara  duang kilo johné ragané majalan satondén nepukin pempatan lantas nuluh rurung mabeton. Sekat rurungé ento mabeton, liu anaké ka carik negakin motor. Sakéwala ragané demenan majalan batis. Sepéda ané belianga tekén cucunné ané taén magaé di kapal pesiar tuah anggona kapah-kapah nuju luas lénan tekén ka carik. 

“Nyomia Korona?” kéto sagét ada patakon di kenehné inget tekén siaran radio ané dingeha aslabsaban tatkala ragané nyeduh kopi di paon. “Koné Koronané ento virus. Makada anaké gelem aéngan tekén paad, sesek tan kadi kanti ngemasin mati. Gelem ané ngaé répot sajan apan anaké ané mati tusing dadi pragatang di sétrané soang-soang. Makejang ané mati ulian Korona koné apang di Bangli ja kapragatang pulah-palihné. Jani ada orta unduk nyomia Korona. Adi tawah dingeha tekén kupingé? Kadén tusing baanga magrunyungan? Yén ada odalan tuah pamangku lan prajuruné dogén ané ka pura....”

Ngancan liu patakon pasliwer di keneh Pekak Dekil disubané mentas di rurung betoné. Arit ané tatada lantas seletanga di bangkiangné. Gering Korona ané ngancan nglimbak tan péndah bancana grubug tusing buungan ngaé ragané bareng jejeh yadian kapah kema-mai lénan tekén ka carik. Ento awanan talin maskerné setata nyanglot kupingné. Kéto masi disubané teka uli carik ragané setata ngojog tongos pangumbahan prabot apang maan ngumbah lima nganggon sabun satondén macelep ka kamarné.

Galang semitan ragané sateked di carik. Lega kenehné nepukin padiné lumlum gadang mokoh. Suba bakat bana ngingaang buin kudang wuku lakar manyi. Satondén ngampak jelanan kubu ragané nelokin sampinné malu di samping. Padang ané arita dibi pesuanga uli keranjang padangé laut pejanga di pagedogané. Sampiné lantas ngamah padangé, kinyuk-kinyuk ngilag sinambi ngégol-ngégolang ikutné. 

Pekak Dekil ngusap-usap tundun sampinné mrasa kangen apan sampi jagirané ento suba nyandang adep. Pastika tusing makelo buin lakar ubuha. Yadin ragané nawang kudang juta lakar nekaang pipis nanging baat kenehné lakar mapasahan ajak sampi ané suba makelo nimpalin ragané di carik. Sabilang ngadep sampi biasané ragané nadak sebet lan blengih, suung-suung kenehné. Nanging tusing ja makelo. Ragané lakar mawali saat yéning suba ada godél buin ngentinin.

Ngrambang unduk ngadep sampi, ragané dadi inget tekén unduké ipidan dugas cucunné gelem tur ngamar di rumah sakit. Dugas ento Putu Sudira nu masekolah lan sedek liu nelahang pipis. Apan bapanné suba tusing nyidang ngulehang pipis, Pekak Dekil ngraosang unduk kaberebehanné ajak Nyoman Subamia ané ngelah carik di samping carik ragané. Sedeng luunga Nyoman magaé di LPD. Dugas ento Nyoman ngorahin Pekak Dekil nyilih pipis di LPD apan tawanga ragané ngelah sampi ané suba nyandang lakar adep. 

Aget iraga ngubuh sampi, kéto Pekak Dekil ngrieng sambilanga majalan nuut pundukan negen keranjang padang puyung. Ia lakar ngarit padang ané uweta di luanan. Suud menékan di pundukan cariké ané sada tegeh ragané marérén tur makipekan kuri ka kubunné. 

Kubunné majujuk di tebénan carikné. Maraab asbés tur maseleng bedég, kubunné mapah dua. Asibak anggona badan sampi, buin asibak anggona tongos malebengan apan tengainé ragané tusing mulih madaar. Di tengah kubunné ada jalikan ané dadi kisid-kisidang malakar aji tanah. Ditu sadina-dina ragané mubuh tur nglablab jukut. Jukut kacang dawa wiadin klongkang wiadin paya ané pulana di pundukan carik di malun kubunné. Suba ada limang tiban jalikané ento belina di peken ané setata liwatina kenjekan majalan ka carik.

Ngarit di tongosé galang kasunarin ai ané karasa ngancan panes, peluh Pekak Dekil pakatéltél. Acepok pindo ragané ngusap peluh di gidatné aji lengen. Tusing karasa suba ategen ragané maan ngarit padang. Apan suba marasa seduk, ngéncolang ragané mabalik ka kubu sambilanga negen keranjang bek misi padang. Teked di kubu ragané lantas ngendihang api lakar mubuh di jalikané. Ragané inget nu ngelah rempéyék gerang ané sepela di kontong ledledang jajané. Sinambi ngantiang bubuhé lebeng ragané pesu ngalap klongkang lan ngémpok tabia krinyi. Yéning kabenengan namping taluh, dikéngkéné ragané nglablab taluh kapah-kapah. Nanging tengainé ento ragané madaar tuah magoh rempéyék gerang, jukut klongkang malablab tur tabia matah mabejek maaduk uyah.

Buka dinané ané suba liwat, yén suba wareg ragané nguadang bangkiang di duur tikeh plastik ané makebat di samping jalikané. Tondén makelo mabahan sagét dingeha ada anak teka.

“Om Swastyastu. Kak, ada di kubu to?”

Pekak Dekil ngadébras bangun nyagjagin pesu.

“Om Swastyastu. Yé, Madé. Kadén nak nyén. Apa aba Madé to?”

“Séla, Kak,” saut teruna ganggas ané natad tas krésék selem. “Ampura tiang ngulgul Kak.”

“Sing kénkén, Dé. Mai ja ka tengah. Kanggoang kéné cem. ”

Madé macelep ka kubuné. “Inget kén Kak ngelah jalikan, jeg nadak tiang makita séla malablab. Dadi tiang malabuh nglablab séla dini, Kak?”

“Nguda sing. Sedeng luunga Kak suba makelo masi sing taén naar séla.”

“Nah men kéto, lan ajaka nglablab séla sambilang ngorta kangin kauh.”

“Ndén té malu. Madé nak kija gén kapah ngenah?”

“Ah, tiang ijek sing karuan-karuan, Kak. Uli pidan suba tiang makita singgah mai, kéwala mara jani maan galah. Kabenengan masi nu nyepel séla ané bét tiang dugasé ené.”

“Men Madé uli dija busan? Ngudiang sing ada dingeh Kak munyin motor?”

“Tiang majalan, Kak.”

Pekak Dekil lantas nabdabang payuk panci lakar anggona nglablab séla. Panciné isinina yéh malu. Yéh ané cédoka uli gebehé. Suud ragané ngejang panci di duur jalikané Madé mesuang séla bun ané suba kedas makulit barak uli tas krésék ané abana lantas cemplung-ceplunganga ka panciné.

“Madé sing ngaba masker?” Pekak Dekil matakon sambilanga ngamenékang masker ané maserot uli cunguhné.

“Sing, Kak.”

“Sing jejeh kena denda?”

“Jejeh kalalahin Korona kéto naké, Kak.” 

“Aa to ba.”

“Ampura, Kak. Engsap tiang.”

Pekak Dekil negak duur tikehé, mautsaha tusing bas paek ajak Madé. “Mungpung Madé mai, ada ané makita takonang Kak.”

“Apa to, Kak?”