Nyomia Korona
Sujatiné adan melahné I Wayan Rudiana. Sakéwala, apan ragané setata nganggon baju ledledan tur kapah mapanting, anaké pada ngaukin ragané Pekak Dekil. Pang aluhan ban nyambat miribné.
“Ané orahanga nyomia Korona to apa men sajané, Dé? Apa patuh kén nyomia butakala di pangrupuké?”
Madé makenyem laut masaut. “Sing ja kéto, Kak. Yén tatujoné dong patuh, pada ngaé degded. Ngapti apang Koronané suud ngrabéda.”
“Apa binané?”
“Buka ané suba jalanin Kak. Kija-kija nganggo masker, setata inget tur pepes ngumbah lima nganggon sabun, sing luas kema-mai yén sing ada ané saratang tur sing magrunyungan. Yén suba kéto sinah Koronané sing ja lakar nglalah.”
“O kéto, mara Kak resep. Kadén Kak patuh cara nyomia butakala di pangrupuké.”
“Dingeh tiang, suba pada masuntik vaksin koné di kantor désa. Men Kak suba masuntik?”
“Suba. Nak tondén ja benehné maan giliran. Apan liu ané buung masuntik ulian ngraksa sakit, Kak ataga ongkona ngentinin.”
“O kéto, Kak.”
“Aa, bin abulan koné mara bin lakar masuntik. Kak héran ngudiang anaké ané ngenah seger oger sing dadi masuntik. Sakit apa sujatiné?”
“Biasané ténsi tinggi, Kak.”
“Ané cara puruh to?”
“Mesib, Kak.”
“Apa ané makada anaké ngraksa sakit kéto, Dé?”
“Liu, Kak. Ulian papinehé ruwet masi bisa. Kéwala jani liunan anaké kéto ulian ngrapu madedaaran. Lebihan madaar ané bek misi uyah. Buka amik-amikan pagaén pabrik ané pada demenina tekén anaké jani.”
“Aget Kak sing pati demen kén ané kéto-kéto. Yén kabenengan ada surudan, Kak demenan naar jaja Bali.”
“Apa ané rasaang Kak disubané masuntik?”
“Kak sing ada mrasa kénkén. Sing ja nyakitang awak cara ané lénan-lénan. Sing panes buka pisagané kanti bungker duang lemeng.”
“Sing sajan mrasa kénkén, Kak?”
“Tuah bulen akejep di tongosé masuntik.”
“To artiné Kak seken-seken seger. Nawang Kak apa ané ngranang?”
Pekak Dekil kituk-kituk. “Apa ané ngranang, Dé?”
“Ulian Kak pepes kena ai semengan.”
“Men ané lénan apa sing taén kena ai?”
“Taén, kéwala sing sabilang wai cara Kak.”
“Angayubagia Ida Batara suba lédang mapica seger.”
Iteh ngorta kangin kauh saling sautin, tusing karasa sélané sagét suba lebeng. Sinambi ngantiang sélané émbon maka dadua nglanturang raos. Ngraosang unduk kramané ané pada ngrémon mapan suba makélo tusing dadi ramé-ramé ka pura, tusing dadi nekaang undangan liu tatkala masakapan, kéto masi tusing dadi magong-gong tatkala ngabén wiadin ané lénan.
Sedeng masi makeloné Madé nimpalin Pekak Dekil ngorta. Disubané ragané ngalahin mulih, Pekak Dekil lantas tuunan nuut pundukan néngténg émbér lakar anggona nyalud yéh di bulakan duur tukadé sambilanga kayeh. Mabalik ka kubu Pekak Dekil sagét marasa semang, cara ada ané kuang. Inget ragané tekén jelanan kubuné tusing maubet kéto masi séla ané masisa di tas kréséké.
Teked di kubu dapetanga tas kréséké tusing ada. Tawah karasa. Ané suba-suba ragané tusing taén kélangan apa-apa. Pekak Dekil bimbang tur lantas ngumik padidi, “Ada ya unduk Madé malipetan nyemak tas kréséké?”
Apan suba mekén sanja ragané ngubetang jelanan laut majalan mulih sambilanga natad arit. Teked di malun cariké ané katajukin séla bun ragané marérén. Ragané nawang ento carikné Madé ané ajaka ngorta di kubuné.
“Dija ya Madé ngebét séla?” ragané ngrieng. “Pamulané ené tondén ja makelo tuuhné, sinah tondén ja maumbi.”
Kenjekan majujuk padidi sinambi mapineh-pineh dingeha ada motor teka lantas marérén di samping ragané.
“Ngudiang bengong, Kak? Yén kal mulih lan bareng magandéng.”
Pekak Dekil kituk-kituk lantas matakon nyekenang, “Beneh né carikné Madé, Man?”
“Beneh, Kak,” Nyoman Serina masaut. “Gelah Madé Ambara, misan tiangé ané magaé di hotél to. Mara sajan kabaranga tusing nu.”
Komentar