Nyomia Korona
Sujatiné adan melahné I Wayan Rudiana. Sakéwala, apan ragané setata nganggon baju ledledan tur kapah mapanting, anaké pada ngaukin ragané Pekak Dekil. Pang aluhan ban nyambat miribné.
“Dewa Ratu! Sing pelih nyén, Man?”
“Pelih kénkén, Kak? Mara sajan tiang télpuna. Tiang tundéna mulih énggal-énggal kal ajaka mapitungan. Madé kal makrémasi di Bangli.”
“Di Bangli?”
“Aa, di Bangli. Kak sing nawang Madé kena Korona?”
Pekak Dekil ngisiang sirahné marasa buka lakar niwang.
“Kak kénkén to?”
Pekak Dekil kituk-kituk. “Kak bingung.”
“Bingung kénkén, Kak?”
“Busan Madé ajak Kak ngrembug di kubu sambilang nglablab séla.”
“Masak? Sing ada unduk kéto.”
“Badah, Nyoman sing precaya. Nak mara sajan ia mulih. Kak mara maan kayeh gén lantas majalan teked dini.”
“Béh, tawah sajan. Ada ya unduk atmané Madé ané nekain Kak? Sing ada mabesen apa-apa ragané?”
Pekak Dekil buin kituk-kituk. Paningalanné nadak belus. “Baju ané anggon Kak ené, baju ledledan pabaang ragané.” 7
Komentar