20 Oktober 2024
Ping kalih ping tiga Gdé Kawi ngebit-ngebitin kalénder I Ketut Bangbang Gdé Rawi, somahnyané Luh Riani ten banget ngrunguang.
“Ah déwasa apa jenenga aliha anggon acara di kantor désa,” kadi sapunika pakrimik anaké istri jroning manah, sinambi iteh nugel-nugel slépan megat sukat ngikut sikut, nyait kojong daksina tambis puput.
Rumasa ring padéwékan wantah ibu rumah tangga, pendidikan pas-pasan, penghasilan ndéwék ngos-ngosan, mawinan Luh Riani ten karing mencampuri urusan politik téték bengék sang suami. Ri sampuné sarahina-rahina, tan pagi tan tengai tan wengi, ping pat ping lima Gdé Kawi modang-madingang lempir-lempiran kalénder Bali kasub kasumbung sajagat, wawu kadaut somahnyané matakén.
“Beli?” Siep.
“Beli?”
Sepi.
“Beli?” Sipeng.
“
Beliiii…?”
“Aikah. Bisa masé nyengking I Koncréng.”
“Koncrang koncréng koncrang koncréng. Awas nyanan nagih nah…”
“Ah da da da! Ngidih olas da mogok da!”
“Makanya yan ada anak matakon, sautin!”
“Taksu sedeng gedé, ajaka nutur, ya léwat.”
“Subhadéwasa apa alih Beli to? Jeg sawai-wai ping pat ping lima ngebitin kalénder?”
“Subhadéwasa bebedag adag. Asubhadéwasa ada ya unduk.”
“Lho. Yan anak malin kalénder, pasti ngalih déwasa ayu. Né Beli nguda soléh ngebitin kalénder malah ngalih déwasa ala?”
“Beli sing ja ngalih. Beli ngetékin dot nawang bin kudang wai ya enu sisan waktuné kanti déwasa jelék totonan teka?”
“Déwasa jelék? Béh beneh saja waké ngelah somah muané modél. Jantukné ngenjol karep ngenjol kori cara glanggang. Kenehné masé nglanggang. Awak berig tegeh, pejangin kuncir gén, jeg bedik sing kutanga Pétruk,” krimik somah Gdé Kawi jroning ati. Ten purun metuang, ajrih somahnyané mamedih, wastu jantuknyané sayan ngonjol.
Nénten pisan kamanah antuk somahnyané, déwasa jelék kadi napi sané kauleng olih Gdé Kawi. Sawusan pabligbagan bawak subhadéwasa-asubhadéwasa, somahnyané tan makita malih nglanturang matakén. Malah Gdé Kawi kari nglanturang ngebut ngebat-ngebitin kalénder. Mecik péléngan mecuk alis metékin malih kudang rahina masisa galah nepék 20 Oktober 2024.
20 Oktober 2024? Nggih, 20 Oktober 2024. Wrehaspati Pahing Julungwangi 20 Oktober 1994 ngunikala, Gdé Kawi kapikukuhang dados Perbekel Nusantari. Sesampun kalih période dasa tiban, Redité Kajeng Kliwon Uwudan Pujut 20 Oktober 2024 sampun kelar, madem saklar, tugas saplar, stop ujar, manut uar-uar, ninggal dampar, nampeh damar, saking kursi makebiar matilar, ten wénten tawar-menawar.
“Béh sing dadi tawah nyang abedik.”
“Tawah? Ah pamineh Bapaké dané tawah-tawah. Jabatan boya dagangan Pak. Ten wénten tawar-menawar. Yan meli mébel, dados saling tawah.”
“Pang kanti tutup taun. Nyalah. Bin telu bulan kanti Désémber gén, apa sih artiné?”
“Jangankan abulan telu bulan, awai ten dadi tawah Pak.”
“Awai sing dadi tawah?”
Komentar