Landep

“Beneh Dé, pajalané dugas cenik masekolah rasané mara ibi, pepes bakat ingetang,” I Landep memarma. 

“Kéné beli, ngomongang foto, kayang jani i raga suba ngelah gambar dugas cenik masekolah, dugas kelih mara magaé lan dugas maliang-liang malali, sing kéto beli!” imbuh Madé Ari.

“Kéto-kéné kénkén?” takon I Landep sada cucud.

 “Sing kénkén, kéwala ada enu perlu uratiang wiréh sayan tua, jani ené iraga kasuyaktianné sedeng ngaé foto, ngambar pengalaman sisan idup,” Madé Ari nyekenang sada mafilsafat. 

“Maksud Dé?” sesed kurenanné.

“Nah pajalan iraga mula kéto, yén sing pelih, ené Mimbar Agamané di koranné ngorahang, idup i manusa kaepah dadi patpat,” teges Madé Ari saha ngédéngin koran.

“Kén Dé, baang beli ningalin,” idih kurenanné.

“Pirengang té! Iang suba maca,” abetné Madé Ari.

“Nah lautang!” I Landep ngantiang. 

“Mula lengut baana nyatuaang dini, sang pangripta nganggé pandangan universal, dané ngedum idupé ené aji simbol semesta, patpat paletan kocap sekadi waktu: dina semengan; galah tengai; ri kala sanja, lan nyaluk peteng. “Cacep tur ringkes Madé Ari nerangang.

“Dina semengan, i manusa mara bangun, sinah seger, galah luung anggon malajah, ngalih pangewruhan apang ngelah bekel lakar nyalanin kahuripanné. Luungan masekolah yén nyidayang dugas enu wimuda, apang énggalan prasida nemu apa ané kaaptiang. Yén suba galah tengai, sedeng bayuné gedé, ditu i manusa suba maan ajah-ajahan jangkep, kawisésan nincap, mara nyumunin ngalih gaé, apang nyidayang membiayai hidup, ngelah kurenan, ada pianak, apang seken nyidayang ngalih pangupa jiwa. Manyama braya, tuun mabanjar, ngayahang dadia lan parikrama ané lianan di désa pakraman perlu béaya. Katuturang jani ri kala sanja, ditu i manusa koné bisa lakar menikmati hidup, wiréh suba ngelah pangewruhan, sampun polih pakaryan, maan gaé tur hasil, wénten galah lakar meseneng-seneng, malegan-legan manut dresta lan uger-uger kawicaksanaan. Yén suba nyaluk peteng, nyumunin suba nyansan tuna, gigi suba pawah, lima kasemutan, tusing nyidayang magaé keras, nyaluk geginan anak lingsir, ngajeng bubuh ané alus, patuh alusné cara ngidepang tutur kadiatmikan. Nunain ngulurin indriya, wiréh lakar ngungsi sunia-loka.”

“Béh, mabuat pisan piteket Mimbar Agamané ené Dé,” I Landep maseseken.

“Iang cumpu beli, yén umpamayang cara suryané suba sayan séng kauh, pantesné uling jani mataki-taki, ngéling-ngélingang tatuek idupé ka mercepada, seka bedik nguangin kemelekatan duniawi, apang tusing baat tikul majalan mulih ka alas wayah.” 

Munyin sepéda motor Honda Vario nyansan maakang, ngenah I Putu pianakné ngandél kurenanné mara teka uli magaé. Wiréh suba ada jani jumah ngempu, Madé Ari ngajakin kurenanné ka swalayan, meli buah apa luiré karana buin mani lakar otonanné I Landep, ngatelunang rahinan tumpek. 7