Kunang-kunang Tengah Lemeng

Ia mula demen muspa nuju peteng. Ia ngrasaang di petengé nepukin galang. Pinih tusing galang kenehné suud muspa ngaturang suksma ring Suungé. Asep dupané nyujuh langit. Di arepné ada canang sekar ané lakar anggona muspa. Tegakné melahanga krana lakar tangkil ring Suungé. Ia ngrasaang sepi jampi guminé dugasé nika. “Mirib baan Tilem Kasané ngranaang,” kéto Bapa Sunia ngrieng padidiana di sanggahné. Somahné tusing nyangetang dedemanné Bapa Sunia. Suba tawanga sabilang Tilem kanti peteng di sanggahné méh bisa kanti maganti dauh mara marérén mabalih peteng.

Ia muspa ngaturang isin kenehné ané jalananga dugas lemahé. Nunas pangaksama ring Suungé mapan ia inget awakné liu tusing anut pajalané. “Tusing ada pelihné nunas pangampura, ring Suungé. Anak idup adana bisa dogén singsal pajalané. Iraga ngrasaang beneh, anak lén ngrasaang pelih,” kéto ia nutur di kenehné padidi.

Dinginé sayan makelo sayan dadian rasaanga. Ia masi matakon-takon di keneh, “ngujang dadi sayan ilang dinginé. Yén alihang jani dingin pesan. Liu anaké nyambatang pratiwiné joh ajak suryané jani. Antesné dingin pesan.  Ené suba sayan peteng guminé. Yén antesné sayan peteng sayan ninginang, ené dadi nungkalik?” Bapa Sunia makeneh-keneh, “Ada apa sujatiné?” Ia sayan ngincepang kenehné ngaturang bakti. Kenehné kija kadén lakuna. Sagét ia nepukin kunang-kunang pakanyitnyit di kenehné. Ento lantas tagih ejuka. Sabilang lakar ejuka, kunang-kunangé ento ngejohang. Kanti ping kuda-kuda ejuka sayan ngejohang dogén. Buka ewér masi kunang-kunangé ento. Bapa Sunia ngrasang ajaka ka tongos sarwa bungané lan sarwa kayuné ané miik-miik. Ada kayu cenana, kayu majagau, nagasari, cempaka kanti ia nepukin kayu sakti. Bapa Sunia tusing kuangan daya, engkebina kunang-kunangé ento di betén kayu majagauné. Mara jejepina kunang-kunangé ento lantas makeber menékang. “Péh kalahang kunang-kunang cenik awaké ené. Kunang-kunang dogén tusing bakat baan ngejuk kalingké lakar ngejuk isin keneh.” Ia ngrieng padidiana.

Sayan ngincepang idepné Bapa Sunia. Ia ngrasaang awakné tusing tepukina buin. Ia jani makesiab. Ia ngalihin awakné. “Kija awaké ené? Nyén mlaibang? Dija ia nongos jani? Dadi mrasa tusing pawak?” Usudina kenehné. “Tusing nyem, “Tusing mati déwéké,” kéto ia mamunyi ngingetang kenehné. Alihina awakné kanti kenyel, tusing masi tepukina. “Mirib ada ané ngengkebang awak idéwéké. Dadi manusa tusing mapawakan jani.” Sayan liu tepukina kunang-kunang pakanyitnyit. Sayan égar kenehné lakar nyidaang ngejuk kunang-kunang. “Jani, sinah lakar bakat kunang-kunang anang abesik kéto liuné.” Sabilang lakar jepjepina, sayan ngejohang makeberné, buka ngéwérin Bapa Sunia. 

Ia majadengan. Inget tekén ngelah angkihan baan nyilih. “Angkihan patut masi degdegang apang tusing énggalan makesiab. Yén pepes makesiab bisa papusuhané pegat. Yén bes ngampet ngisinin keneh sinah baya lakar tepuk.” Mategtegan ia di betén punyan kayu saktiné, kayu dapdap anaké biasa ngorahang. Kayu saktiné dugasé nika nedeng lom doné. Gadang-gadang, buka nganyudin kenehné lakar ngémpok. Ia tusing bani ngémpok krana inget peteng. Nyanan ada lelipi gadang, bisa sengkala. Tangar masi Bapa Sunia. Tingalina ada batu lémpéh di bucu kaja kangin kayu saktiné. Ia nelektekang, tepukina ada canang buratwangi. Makeneh-keneh Bapa Sunia, “Nyén ia maturan canang buratwangi? Ah, lakar ngujang nakonang anak maturan. Patutné angayu bagia ada anak éling ring Sanghyang Embang.”

Kunang-kunangé buka nyailin Bapa Sunia. Jeg di sirahné mencegan abesik. Mara lakar jepjepina sagét makeber. “Péh gumati éwér kunang-kunangé ené. Yén bakat, lakar wadahin botol. Dong nyak sesai tepuk makenyit.”

Kanti mabileh rasanga dauhé, Bapa Sunia enu masi kenehné makita ngejuk kunang-kunang. Somahné suba tambis ping telu enten, “Tumbén i beli enu di sanggah. Tusing rebut legu lan semut awaken? Dadi demen gati uyak damuh peteng? Awak ngelah sakit asma, gigisin madamuh-damuh. Yén gelem idéwék suba lakar répot.” Jeg jagjagina Bapa Sunia tekén somahné ka sanggahné. Gigis kesiaban somahné, Bapa Sunia tusing tepukina. “Kija I Beli Sunia? Ituni tepuk ka sanggah mabakti dadi tusing ada?” Mémé Keling inguh atiné. Jejeh kenapa-kenapa kurenané. Ia tusing bani nundun pisagané krana enu peteng dieng, buina misi ngemu gulem langité, ujan ngribis suba tuun. Sinah yén nundun pisagané lakar tusing ada ané enten.

Mémé Keling ka paon, ia nunas ring Bhathara Wisnu ané malingga di genuké. Nunas ring Bhathara Brahma ané malingga di jalikané. Ia ngacep apang somahné tusing nepukin pancabaya. Inget ia dugasé ipidan lakar satia kayang kawekas. Suka-duka lakar ayahina bareng-bareng. “Ratu Bhathara suécanin déwék titiang. Tulungin somah titiangé Beli Sunia. Ipun gumanti panegulan manah titiang, wantah ipun nénten kapanggih, jaga pegat manah titiangé Ratu. Sampunang ambila somah titiangé.” Busan-busan Mémé Keling ngamé-ngamé kurenané. Tusing masi mrasa ada cihna lakar teka.

Sagét buin jebosné majujuk Bapa Sunia di sampingné. “Anak ngujang peteng-peteng ka paon?” Bapa Sunia matakon.

“Ngujang ka paon kéto?” Mémé Keling mamunyi sada bangras. “Kija adana mlali?”

“Mlali?” Bapa Sunia mabalik matakon.

“Beneh. Alih ka sanggah dadi tusing ada?”

“Tusing ada kénkén?”

“Uling tuni di sanggah.”

“Eda ngéndah dadi anak tua. Yén kené, sinah suba tusing beneh pajalan Beliné.”

“Tusing beneh kénkén?”

“Ngaku muspa dadi tusing ada di sanggah? Ngaé-ngaé dogén. Kénkén sujatiné kenehé? Awak suba tua misi demen mlali peteng-peteng.”

Bapa Sunia séngeh. “Mirib baan petengé ngranaang, sangkan tusing tepukin méméné. Ené tingalin awak beliné bek misi damuh.” Bapa Sunia ngusapin awakné. Ia tusing nyak nyambatang, ituni nepukin kunang-kunang di tengah lemengé. Yén ento tuturanga, sinah lakar boyaina lan tandruhina bisa-bisa sambatanga tusing tegteg. 7