Kocong Kawit Ngisengin Gati

Ampun wareg koné. Batis matindakan pesuan uling embakané dogén né kuangné. Béh, yakti. Wénten bin abesik kuangné. Embok né sayanin ngrunguang bapa, kali mangkin déréng majlawatan teka. Kari iju gati jenenga jumahné.

Rasaanga bulen di témpol jit, ngénggalang Aru Supat mabading. Kejengit-kejengit Yan Kocong. Lima kenawanné tepukina kari nganggar, ngisi jlijih amun kukun inan limané. Ngantiang nyabat dogén. Yén ten té énggalan ngehanga tekén Aru Supat, bisa bin bulen témpol jitné. Ten ja ngedegin basang tandang anaké cerik nika. Ten gati kénten. Di pinih lacuré grimuten dogén baana basangé.

Tepukina kenyem Aru Supaté, nyagjag Yan Kocong. Delenga Aru Supat. Cara méng mamangsang nabing pitik mesik. Ampun makita gati nyagrep. Kemik-kemik bibihné, abuku ten pesu munyi.

“Suba maan madaaran, Yan?” Ten gati sautina patakon Aru Supaté

“Seduk basangé, Yan?” Majumu Aru Supat matakon.

“Rtyprtyrtyprtyp.” Ten kakeneh baana tekén Aru Supat.

“Apa né korahang ento, Yan?” 

“Dghjkldghjkldghjkl.” Maklebeh Aru Supat. Yan Kocong, Yan Kocong. Ngisengin gati té cai. Sagét nagih degagin. Sagét nagih natyain. Sagét nagih ajumang. Sagét nagih nistaang. Marasa gati Aru Supat tekén belogé ten bakat kendelang. Ngenemin anak cerik mabok gading dogén déréng seken kakeneh baana mesuang raos, kaling ngenemin né kelihan. Bisa slimputen baana layahé. Ngemasin di élahé katanjung. Kanti bin majumu baana Aru Supat matakon.

“Sampun polih minab Wayan majengan? Napi durung minab?”

“Durung, Beli, layah pisan basang tityangé.” Mimih, ngatih gati pasaut anaké cerik. Ten bin nutugang Aru Supat matakon. Ka paon lakuna Aru Supat. Pesu-pesuan uling paon Aru Supat ngaba dadaaran apiring, yéh nyem alumur. Naré anggona tatakan.

“Majengan dumun Wayan nggih.”

Ten masaut anaké cerik. Dampinga dogén dadaarané. Pabaliha dogén dadaarané. Kari cara ibi puané anaké cerik. Sangsaya yén ten nyarik né bakat tekedang. Sangsaya yén déréng seken nyukuh tekedné.

“Sampun beli ngejot. Sampun makaileh. Sampun lungsura minab ring ayamé. Nénten wénten tampakné. Rauh ring daunné minab plaibanga ring ayamé.” Lantang raos Aru Supaté, apang guguna tekén anaké cerik. Seken nyak guguna. Di tené guguna, déwa rauh bakat ubetin jelanan. Inih ya buncul tumpur idupé. Ten kena supat aidupan.

“Tunas tityang swécané.” Clemen-clemen anaké cerik madaaran. Demen baana Aru Supat medasang anak cerik seleg madaaran. Ten gati macarikan. Ngrawa keneh Aru Supaté. Nglaku-laku.

Kari cerik Aru Supat dugas nikané. Ngedé gati keneh Aru Supaté. Manyama ajak papitu, pedina Aru Supat mwani. Marasa tekén lekadné buatang mémé buatang bapa. Wiréh di tené ngelah santana mwani, suwudanga mapayah-ayah di dadya, di banjar, di désa, kapi awak kari ceteng. Kapi ngelah anak cerik luh. Awak kari ceteng ampun sorpaang nyama. Wiréh ten wénten né lakar nyaludin ayah-ayahé di ampuné manian raya. Wiréh ten wénten né lakar najuhang ayah-ayahé.

Kari cerik dugas nikané Aru Supat. Déréng masekolah. Gigi déréng maketus. Kari taksu, kénten koné. Lima kenawan maliwat bunbunan, déréng teked baana nyuhjuh kuping di kébot. Lima kébot maliwat bunbunan, déréng teked baana nyuhjuh kuping di kenawan. Nanging kari kingetan baana. Kari melah kingetan baana. Ten misi keneh Aru Supaté. Kari tileh, déréng maan usuda, akau Aru Supat ngentungang nasi ka natahé. Mendep jana bapan Aru Supaté. Melahanga gati nuduk nasiné, wadahina kau né entunganga tekén Aru Supat. Apikina gati ngumbahin nasiné. Ten ngalihang timpal nasi, clemen-clemen bapan Aru Supaté nyambal nasi.

Telah baana naar nasiné akau, kau ampun umbaha, ampun ngumbah lima pada, sangkola Aru Supat. Abina di ampiké. Ten gati Aru Supat maplawanan.

“Diolas, ampunang plegéndanga, Beli.” Ngidih olas mémén Aru Supaté. Mendep jana bapan Aru Supaté.

“Gedé,” kénten dogén né pesu raos bapan Aru Supaté. Ten bani masaut Aru Supat. Bareng mendep jana mémén Aru Supaté.

Makelo ten wénten né macekisan. Kadirasa makrisikan pada ten bani.

“Bin mani puan nggih, ten misi keneh Gedéné, piring sutrané dadi sabatang ka batuné. Lumur gedahé dadi pantigang di batuné.” Mendep bapan Aru Supaté, makejang pada mendep. Ngraos bapan Aru Supaté, makejang pada mendep.

“Abesik gati pangidih uwané tekén Gedé. Ampunang gati ngéndahang dadaaran. Dadaaran nika Bhatara Shri. Madaaran nika mapangiring tekén linggih Bhatara Shri.” Ngendih jenenga tepukina pabaan bapan Aru Supaté, sangkan ten wénten né bani macekisan.

“Dadi Gedé macarikan. Uwa né lakar naar carikan Gedéné. Punang baang sira-sira lénan tekén wa.” Tuwunanga Aru Supat uling pabinan. Dadianga Aru Supat malali, kija ja kitanné. Malali Aru Supat, makaad bapanné. Kija kadén lakuna. Uling mara teduhé, ampun endag ai bin maninné mara bapan Aru Supaté teka mulih. Nyangih arit dogén, bin makaad, negen régang, wadah padang aji tiying akit-akitan bapan Aru Supaté.

Régang nika masanan tiying bungkulan, misi tongos padang duang undit, di malu tekén di duri. Tongos padang né duang undit nika, sabilang undit malakar aji tiying limang tebih. Tiying né limang tebih nika, majujuk patang tebih, ngandang di betén atebih. Tiying né majujuk patang tebih nika, né di duwur uwag makancing di sanané, né di betén uwag makancing di tiyingé né atebih né ngandang nika. Régang né makit ngandang nganjuh nika anggona wadah padang marit.

Ampun kanti makatelun buka kénten abet bapan Aru Supaté, sebet keneh mémén Aru Supaté. Di embakan kubun sampiné mémén Aru Supaté ngantiang bapan Aru Supaté teka uling ngarit. Di embakan kubun sampiné abetné negak malimpuran. Aru Supat déréng nawang madan babuk dalem. Aru Supat déréng nawang madan beneh pelih. Pelihang, déréng kakeneh baana. Ilonin, ten karesep baana.

Ngénggalang mémén Aru Supaté matingtingan, kari masimbangan di embakan kubun sampiné, mara tepukina bapan Aru Supaté dungkun-dungkun negen padang arégang. Nyaru-nyaru paliyat bapan Aru Supaté. Ampun paak bapan Aru Supaté, nyamping mémén Aru Supaté. Aidupan ngalih impasin papag kala. Aidupan ngalih impasin uber kala. Nyamping anggon ngimpasin embet.

“Ampunang kentana ragané, Beli, tiyang né pelih, ten nyukuh baan tiyang ngurukang panak,” ngraos mémén Aru Supaté di ampuné telah baana padangé né di régangé baanga sampi.

Negak bapan Aru Supaté di batuné, ngiyatang peluh. Mémén Aru Supaté negak di batuné masih, né di samping kurenanné. Ngraos bapan Aru Supaté, “Baang ragané ngraos, sisu baana tiyang nyautin. Kén né malunang, kén né durinang, paling baana.”

Mendep mémén Aru Supaté. Grimuten basangné. Séngeh bapan Aru Supaté. Pada ngelah sikut. Pada ngaba sikut. Nutugang bapan Aru Supaté ngraos, “Ten wénten né pelih. Ten masih tiyang makenta. Di tegalé ten kuangan né lakar daar. Wénten kuwud. Wénten séla bun. Matah-matah daar tiyang.”

Aluh gati idupé. Cara mentas di élahé. Tresna makurenan, melah baana ngaba di jokan liwaté.

Pabaliha dogén Yan Kocong. Madukan keneh Aru Supaté. Marawat-rawat tepukina Yan Kocong tulén Aru Supat dugasné kari cerik. Tungkas-tungkasina kenehné. Yan Kocong mabok gading. Aru Supat mabok badeng. Yan Kocong mabok ingel. Aru Supat mabok sohsoh. Yan Kocong makulit belé. Aru Supat makulit selab. Yan Kocong manik batun pingalanné pelung. Aru Supat manik batun pingalanné badeng gading.

Sépanan ngeh, telah baana nasiné apiring. Kudkudina gati. Sajaba né ajumput, né di cribik piringé, nika dogén né karianga. Kénten tepukina Aru Supat madaaran, kénten tuwutina tekén Yan Kocong.