Kocong Kawit Ngisengin Gati
Sasuahan ampun nyelep. Tangkep ampun ten dadi baan ngalimpadin. Bekel pipis ampun mapilpil di dompété. HP ampun tekek magisi di lima kébot. Bapa ampun mabaang madaaran.
“Beli lakar pesu nggih?” matakoan Yan Kocong di ampuné iyat baana ngusap-usapang limanné di betekan batisné. Piring ampun sutsuta. Lumur ampun sutsuta. Ampun pejanga di paon. Ampun biasa Yan Kocong pesu mulih di paon. Ampun cara gelaha jumah Aru Supaté.
Wareg basang anaké cerik, tegteg keneh anaké cerik. Suwud manatya ngraos. Kapi kénten ja ten madegag.
“Nggih, ukan pesu,” Aru Supat masaut.
“Pesu pun beli.”
“Imbok déréng ja teka.”
“Ten tuyuh ngantiang imbok teka. Tiyang pun nguwahin ibapa. Driki dogén pun tiyang. Ten bin tiyang kija-kija.”
“Padalem ya Wayan.”
“Ampun pepes ka tiyang ngenemin ibapa. Demen ka ibapa nemin tiyang.”
“Demen dong demen. Beli jumah nika.”
“Kenapi laut beli ten wénten jumah, tiyang dogén ngenemin ibapa?”
“Ten ja kenapi-napi. Nanging yén mejunin laut bapan beliné, lakar kéngkén laut baan Wayan makanda?”
“Bisa tiyang ngoncéngin ibapa. Bisa tiyang ngentinin pampers-né ibapa. Ampun pepes té beli tepukin tiyang ngencanin ibapa.”
“Nggih yén nyak. Di ten nyaké, lakar kujang laut?”
“Laguté tiyang kari cerik, ten gati gugu beli.”
Péh, wayah raos anaké cerik. Kapi kénten, ten peraha jeleké baang anak. Ten braya, ten papernahan, joh para jeleké lakar enjuhin. Kenyemé édéngang, pakidihang. Sakité engkebang, sapsapang.
Mulihan lakuna Yan Kocong. Gati ngenemin bapan Aru Supaté. Kenyem-kenyem baana Aru Supat.
“Sira tiyang, Odah?” matakon Yan Kocong sambilanga ngediang pelék bapan Aru Supaté.
“Sing tawang odah,” masaut bapan Aru Supaté, kalud misi ngajum, “Bagus gati cai.”
“Tiyang cucun odahé, bagus ya tiyang. Odahné bagus, cucunné bagus.”
“Kawit bagus odah, nanging sing odah ngelah cucu.”
“Tiyang panakné bapa Aru Supat.”
“Nyén madan Aru Supat?”
“Anak cerik odahé nika.”
“Ngelah odah kurenan, sing odah ngelah panak.”
Mabecacotan Yan Kocong ngenemin bapan Aru Supaté. Anak ampun paling, ten kena baana ngingetin sira-sira, ten kena baana ngingetang napi-napi, sajaba sampi tekén kakawin. Kujang men. Demené tekén sampi, demené tekén kakawin, kari mirib mentip di kenehné. Wénten bin abesik né kari ingetanga. Kurenanné. Ampun tepukina maraab langit manatah tanah, nyak ajaka makurenan, ampun sinah demenina gati. Mimbuh sayanganga gati.
Pedasanga Yan Kocong ngenemin bapanné. Pedasanga gati Yan Kocong. Makesyeng bayun Aru Supaté. Di asliyabané tepukina Yan Kocong nulénang gati anaké lingsir ané tepukina di Batu Kiping nika. Makéngkén mirib Yan Kocong tekén anaké lingsir nika. Cucuna? Anak cerika? Jering-jering bulun Aru Supaté.
Taén takonina, pangakunné di Tirtagangga madunungan ajaka méménné dogén. Di Jawa Lépang koné bapanné. Madunungan di Tirtagangga, teked di Batu Kiping palalinné. Wénten perah nika? Dadi baan ngugu nika? Kalud anak cerik té? Kawit ngisengin gati Yan Kocong, nanging kari bakat sangsayain. Ngetis apakpakan basé, iyat baana peluhé. Sangsayané?
Maklenting HP-né. Uli di munyi dogén kena baana ngingetin. Chat uling Ayu Surat. Embok déréng teked jumah Aru Supaté. Alih, joh umahné. Gelurin, ten teked munyiné. Kalud ten ngelah HP. Aru Supat déréng teked jumah Ayu Suraté. Paturu saling anti. Paturu kacluwag. Sanggupé déréng nyukuh dadi gisi.
1
2
Komentar