Barongé Atugel

“Yan énggalin madaar!”

“Yan mlajah malu gaé PRé!”

Kenjel pekak Ston ngorahin cucuné Wayan Ston krana iteh maplaian HP uling semengan nganti sanja sabilang wai. Kéto masih petengné maplalian ulinga suud madaar buin nyemak HP anggona maplalian. Kadi rasa HPné tusing taén léb uling limané, da ja nulungin rerama, manjus ajaka madaar dogén ngekoh-ngekohang. Apa mula kéné jani cerik-ceriké makejang? Apa mula jaman janiné miribang kéné? Tusing ja Wayan Ston dogén rasané ané buka kéné. 

Pekak Ston suba wadih ngorahin cucuné. Cucuné tuah abesik ané paling sayanga, kéto masih reramané kaliwat nyayangang.

“Yan manjus malu, kéto goba cara kambing teka uli maburuh!”

“Kambing apa maburuh, kak?”

“Nah énggal manjus! Pragat nglawan munyi.”

Sedek Wayan Ston manjus sagét ada kuluk nyegut HPné miribang HPné mabo pindang krana ia tusing ngumbah lima suud madaar. HPné plaibang kuluk, abané ka tengah gudangé di samping paoné. Disubané suud manjus sawiréh tusing tepukina HPné, Wayan Ston lantas paling ngalih-alihin HP-né.

“Kak, ija Hp Wayanné?”

“Dija pejang? Busan tingalin kak kuluké ditu, apa miribang cakloké abané ka gudang, tegar alihin ditu Yan!”

Teked di gudang Wayan Ston ngalih-alihin HPné, ditu makacakan barang-barang pekakné, sagét ditu ia ningalin ada barong magantung di gudangé ento, ngaé kesiab ia, lantas ia jerit-jerit.

“Kak, kak, kak, kak mai malu kak!”

“Kenapa Yan, dadi jeg pragat kauk-kauk kéto?” Pekakné nyagjagin ka gudang.

“Kak, apa to kak, adi ada barong tusing maikut?” sambilanga nujuhin barong ané ada di tengah gudangé.

“Né barong-barongan Pekak pidan dugasé nu cenik.”

“Adi bisa barongé atugel tusing maikuh kak?”

“Kéné ladné satuané. Dugasé ento tusing cara jamané jani, jamané ento tusing ada plalianan cara janiné. Jamané jani suba serba canggih, ada adané smat puun kéto?”

“Smartphoné kak! Ngorang monto dogén pekak tusing bisa, haha…”

“Nah ento suba, jamané jani cerik-ceriké tusing nawang kénkén rasané makumpul, masuryak kema-mai maplalianan ngajak timpal-timpal.”

***

Nang… tong… nang… jir… nang... tong… nang... jir… pung-pung-pung.....!!!! 

Kéto munyin gamelané dugasé cerik-ceriké mlajah magambel ajak maigel-igelan. Ada ané nepak kendang, nepak céng-céng, nepak gong, makejang suba maan prabot besik-besik. Ané jani ada anak cerik ajaka dadua Yan Kacir ngajak Tut Karud baanga duman ngigelang barong. Sabilang sanja makumpul ajak makejang muruk ngigel ajak muruk magambel. Tuah kéto dogén dugasé pidan gegaén cerik-ceriké, kéto dogén suba ngranang atiné liang. 

Nuju piodalan di Pura Dalem, ditu karencanayang lakar ada péntas igel-igelan, ento ngranayang cerik-ceriké seleg mlajah ngigel, apang ngidang péntas kayang ento. Yan Kacir ajak Tut Karud suba sibuk ajaka dadua maadungan apa luwung igelan barongé. Barongé tusing ja barong sesuunan, sakéwala barong-barongan propan ané anggona péntas tekén cerik-ceriké. Yan Kacir maan duman ngigelang barongé di malu, Tut Karud maan duman ngigelang barongé di ikuh. Cocok pangus mula ajaka dadua ngigelang barong, suba pada-pada luwung agem batisné. Yan Kacir dueg ngipekang tapel barongé, kéto masih Tut Karud dueg ngejerang ikuh barongé. 

“Ih Yan, baang cepok icang di malu?” Tut Karud dot pesan ngigelang barong di malu krana ia nawang anaké pasti ngorahang ané di malu ané duegan, krana maan ngipekang tapel barong. Ento makada ia dot pesan apang tawanga dueg ngigelang barong, tusing ja tuah dadi ikuh barong dogén.

“Auk, cang dogén di malu!” Yan Kacir kukuh.

“Slagenti Yan!”

“Cai di duri gén, suba luwung ditu, icang baang di mukak, cai tusing lakar bisa di mukak.”

“Yén kéto, kayang odalan di Puseh cang baang di malu cepok nah!”

“Nah, cang majanji cai di malu kayeng ento,” Yan Kacir nyekenang krana tusing suud-suud Tut Karud nagih ngigelang barongé di malu.

Krana demen atiné Tut Karud suba baanga lakar masilur ngigelang barong di malu kayang odalan Pura Pusehé, ané jani enyak ia ngigelang di duri. Luung pesan igelan barongé, Wayan Kacir mula duég ngigelang barong, agemné luwung, kipekané tepet ngajak kepakan kendangé. Krama banjar ané nyaksinin makejang angob ajaka ingelan barongé tur ngemaang tepuk tangan. Makejang ngorahang duég tukang bapang barongé, makejang ngajumang Wayan Kacir krana ia ngigelang ané di mukak.