Téjaning Langit

Sapetekan Madé uli Jakarta, suba petang dina ia ngoyong jumah, kenehné enu tusing karuan, ada rasa kangen, rasa pelih, rasa kalah, rasa jejeh, rasa bani, rasa elek, kimud, macampur dadi besik. Tusing karasa, selaku lampah batis Madé kanti suba makéré neked di wates tegalané. Ditu lantas ia marérén, nylélég di punyan nangkané. Meled pesan ia lakar nuju umah ané tusing joh uling tongosné marérén, umah Pak Nengah, nyama tugelan bapané, utawi pamanné.

Sanga warsa suba Madé matilar uli umahné, ninggalin anak cerik muani bagus mara matuwuh telung bulan, ulian kalara idupné. Anak cerik ento suba katinggalin mati tekén méméné, Luh Suari, somahné. Luh Suari ninggalin Madé lan pianakné ri kalaning nglekadang raré cerik ento. Madé tusing ngelah nyén-nyén buin di kaluwargané. Mémé bapa suba maluan ninggalin mati dugas ia nu cerik. Ada pamanné ané ngupa pira, uli cerik kanti ia tamat masekolah di perguruan tinggi. Pamanné masih ngitungang gaé dugas ia nyuang anak luh.

Tusing suba prasida nandang kalaran idup padidian, pianak enu cerik, kénkén carané ngupapira anak cerik? Tondén buin ia ngenehang payuk jakan, ditu lantas Madé ngelah keneh matilar uli désa, merantau ka ibukota. Pianakné lakar nyenggak utawi katitipang kapining pamanné. Ia suba percaya pesan tékén pamanné, ané setata lascarya mapitulung tékén anak kena kabyahparan di désa, apa buin kapining kaponakané.  Nanging ané jani Madé tusing ngelah kabanian makemélan. Suba bes liu Pak Nengah nulungin uripné.

Las suba kenehné lakar nyenggak pianakné ulian nyilib. Madé nu inget, disubané liwat katelun acara nelung bulanin, kala ento nemu Tilem Sasih Karo, sawatara jam 3 nuju ngadaslemahé, ia nyaup tur nyangkil pianakné nuju umah pamanné. 

“Ratu Bhatara Lelangit, leluhur makesami, ampurayang parilaksana titiang puniki, tan prasida titiang ngupapira anak alit puniki, mogiastu Ratu makesami lédang mapaica karahayuan tur prasida ipun lantang tuwuh,” Madé tusing surud-surud maatur-atur, nunas ica ring leluhur ipun. Patikaplug Madé mentas di tegalan ané peteng dedet. Dingin Sasih Karo tusing karambang ulian ati jengah. Bintang Kartika lan Bintang Tenggala makanyitnyit di langité, masunar nerudu pinaka saksi pajalanné nuju umah pamanné.

Teked di angkul-angkul pakarangan Pak Nengah, adéng-adéng ia ngampakang kuriné apang tusing kanti mamunyi makriot, majalan adéng-adéng di natahé tur ngejang anak cerik di ambén Balé Daja. Entil sajan pasaréné, cara suba lakar nawang tur lascarya mapasahang ajak raramané. Buin ngarembes tur makatéltél yéh paningalanné nlektekang pianakné, anak cerik bagus mara telung bulan. “Dumadak cening setata seger oger, énggal kelih. Bapa percaya kapining pekak cenik ané lakar ngupapira cening,” Madé ngusap-usap kidat tur pipi anak cerik ané magulung saput. Di samping raré cenik ané masaré leplep, ia ngejang bungkusan misi susu, baju anak cerik tur nyelipang surat matulis tangan.

“Paman, tiang nitip i cerik buin tékén Paman, suba tusing ada tongos tiang ngejang tresna asih lan pitulung Paman tékén tiang, uli tiang kalain rerama kantos mangkin. Ané jani buin tiang meratin Paman, ngidih tulung upapira buin anak cerik puniki. Tan prasida antuk tiang padidian. Ané jani tiang mapamit, lakar marantau ka Jakarta. Dumadak prasida gelis matulak wali ka Bali. Ri kalané ento lakar idih tiang anak cerik ené buin. Tiang wantah bisa ngamekelang adan tékén anak cerik puniki. Tan surud-surud tiang keni kalara-laran. Adanin ipun I Gedé Téjaning Langit. Mogi riwekas ipun prasida nyunaring paukudan tiang, pinaka téjaning langit ri kapetengan.

Mirib suba ada setengah jam Madé majujuk nyalélég ditu sambilanga mararasan unduké pidan. Sakadi isin surat sané katitipang di samping anak cerik, ia jani lakar ngidih buin pianakné ané katitipang suba sanga tiban ento. Amongkén suba kelih anak ceriké ento, kénkén ja jeleganné, apa mirip méméné, apa masib cara paukudan ipun?

Makelo Madé nalektekang umah pamanné. Sanga tiban, liu kemajuan umah pamanné. Ipidan matémbok popolan, malakar aji endut, jani suba suba matémbok bata. Pakaranganné jimbar, liu misi pepayon, punyan alpukat, punyan kléngkéng, punyan matoa. Konyang mabuah nged tur asri. Kéto masih Balé Dauh, Balé Daja, Balé Dangin tur paon suba magentos luwung. 

Uli tegal ka umah pamanné ento kapasah jalan désa, jarakné ada sawatara limolas méter. Ditu Madé ngintip umah pamanné. Prajani ilang kabanianné ngalangkahang batis nuju umah ané suba ada di arep paukudanné.

Ri kalane ento Madé makesyab, ngatonang ada sagét anak cerik bagus, makulit kedas, maebok inggel, makeblés pesu uli angkul-angkul negakin sepéda mini. 

“Gedé Téja.... pianak bapa!” dot Madé mageluran, nanging sahasa kacaket bibihné. Benyah latig kenehné ngatonang anak cerik ento. Anak cerik sané sampun sanga tiban katinggalin ipun.

Makatéltél yéh panon Madé ngaton anak cerik di arepané. Dot mlaib nyagjagin, dot ngelut paukudanné, dot ngusap-usap ebokné, dot niman pipiné, dot ngandong paukudané. Nanging ia tusing ada kebanian, makelo ia majujuk ngatonan anak cerik ngangin ngauhang negak sepéda di rurungé. Dot ia makaukan kapining adan anak cerik ento. Madé negak maplisahan di bongkol punyan nangka wates tegalé.

“Suksma Hyang Parama Kawi, leluhur makesami, sampun mapaica karahayuan ring ipun, pianak titiang. Sampun gumanti pisan, punika janten pianak titiang, nénten wénten malih marma manah titiang. Nanging durung prasida antuk titiang nemoning ipun. Dumogi bénjang, malih kalih rahina, tigang rahina, petang rahina…, titiang prasida nyanggraang manah nemoning ipun,” Madé maucap-ucap ngaturang parama suksma riantukan sampun prasida ngemanggihin pianak ipun.

Alon-alon Madé bangun, majujuk tur mabalik lampah nuju umah ipun. Ring selagan pepayon, matan ai masunar galang, sayong ngancan ilang, gumi sayan galang. Kedis bacica nguci di pepayon tegalé punika kasaur antuk suaran crét nong.  Jagat masriak galang makadi wénten téja ring langit nyunarang jagat, nyunarang keneh ipun I Madé, irika ring Désa Landuh Asri sané satata landuh, asri, lan lestari. 7