Vincént

Ia tuun uli boat ané tumpangina, Gangga Éksprés ané melah mamesin lalima. Menék uli Tribuana, Kusamba. Ia nginep di Candidasa. Di Candidasa, maan ningalin ombak lan pulo cenik. Petengné di Candidasa mabalih bintang uli sisin pasihé. Sedeng melaha galang langité dugasé ento. Matakon ajak pelayané. “Is that Nusa Penida?” Pelayané manggutan.

Ia suba pepes mamaca indik Nusa Penida. Biasa toris, mamaca malu pulo ané lakar tekaina apang tetes nawang apa ané melah ditu. Apa ané médaang ajak pulo ané lénan. Tusing magisu-gisuan ngalih tongos mlali. Ia nawang pulo ané kelod Baliné pinaka nyaga yéh pasihé apang gigisan ngepung daratané. Yén sing ada Nusa Penida, méh suba anyud sisin pasihé plaibang ombak. Apabuin pasihé sayan nglinggahang dogén. Ipidan yén di Candidasa nyidaang enu majalan kangin kauh masépakbola. Jani, suba ilehin panginapan lan kéweh majalan mirig pasisi.

I Vincént ngajak timpalné uli Australia. Tusing tawang apa ia masomah apa tusing. Apa kenal disubané di Bali? Ia ngorahang lakar ka Nusa Panida buin mani. Timpalné masi nyak apang nawang Nusa Penida. Semengan suba bangun. Yén biasané, toris langah bangun semengan krana petengné magadang. Sopir ané lakar nganjak ka Kusamba suba masi sayaga. Mobilné bersih krana lakar nganter toris. Sesai lapina apang tusing gedeg torisé. Mara macelep dogén suba maksiuh miik. Di arepné, suba misi lengis miik. Kendel gati I Vincént mara ada anak Bali dadi tukang anter. Magenepan takonina tekén I Vincent. Sopiré kanti mrasa kenyel nyautin patakoné masi soléh-soléh. “Ngujang dadi bukité di Bali liunan macongcong jani? Ngujang koné sabilang sisin pasih misi hotél? Ngujang koné di paek purané misi vila?”

Papolosan sautina tekén sopirné, “Pipisé ngranayang. Makejang demen tekén pipis.”
Makenyem I Vincént. “Saja masi.”

Neked di Pelabuhan Tribuana lantas meli tiket. Ia baangina nomer antréan. Boat nomer dua. Tusing makelo lantas mirig menék di jembatan ané lakar ka boaté. Ia tusing nyak negak di malu. Di duri paak mesin boaté. Koné apang maan ningalin jimbar pasihé. Mamunyi mesin boaté makalima lantas nujah yéh pasih. Muncrat-muncrat yéh pasihé. Ento rekama tekén I Vincént apang ada édénganga tekén timpal-timpalné di Australia. Ada selaé menit suba neked di Pelabuhan Sampalan. Pelabuhan ané melah. Mara teked, suba ada ané nyagnyagin krana suba majanji ajak gaid uli Nusa Penida. Édéngina tulisan, VINCÉNT. Énggal ka parkiran lantas majalan.

Alihanga réstoran ané paek ajak pasih. Kendel kenehné I Vincént. Pesenanga kopi lan roti ané suba biasa aliha. Ia kenyem. Nyaambi ngajeng nelektekang kesiuhan ombak. Ia ngaukin sopir ané nganter. “Tiang meled bubuh lédok. Koné uli Nusa bubuhé ento? Nyidaang ngalihang bubuh lédok? Lamun ada tipat kuah pindang, dadi masi.”

Gaid ané suba cara matimpal ento kipak-kipek. Ia makeneh-keneh dija ada ngaé bubuh lédok jani? Ipidan saja liu ada bubuh buka kéto, aluh ngalihang. Jani, dija ngalih?”

Énggal ia manggutan. Inget tekén Dadong Ranten ipidan pepes ngaé bubuh lédok. “Nyanan sanjané alihanga bubuh lédok,” kéto ia nyautin. Di kenehné, masi jejeh. Enu apa tusing Dadong Ranten madagang bubuh lédok? Madak apang enu ada. Geduh-geduh masi kenehné. Yén tusing maan, sinah lakar bisa tusing teka buin I Vincént ka Nusa Penida.

Dadong Ranten suba makejang nawang. Sabilang ngaé bubuh lédok, ngantré anaké meli. Ada anak ngrekam lantas édénganga di FB liu ané maangin jempol. Mirib ento ané taén pacana tekén I Vincént sangkan meled gati tekén bubuh lédok. Adané dogén lédok sinah suba bubuhé ento lédoka ping kuda-kuda apang melah gencuhan basa-basa lan jukutné. Melah ajeng nuju enu anget. Seger bayuné baana.

Sanjané énggal nekain. Matanainé suba nyerorokang kauh. Paningalané I Vincént nelektekang matanainé kanti engseb. Ia inget tekén panagihné. Ajakina ngalih Dadong Ranten. Gaidné mautsaha apang tusing inget tekén bubuh lédok. Sedeng melaha ada dagang tipat kuah mabé pindang, ento malu rérénina. Péh kendel masi I Vincént mara kena tipat kuah pindang majukut nangka. Cliem-cliem masi misi naanang lalah. Toris mula tusing sanget kuat tekén lalah. “Ené melah rasané. Misi bé pindang, misi jukut, péh mula dueg ngracik ajeng-ajengan. Mani urukang, nah.” Gaidé manggutan. Diastun ia tusing bisa ngaé tipat makuah pindang, apang lega I Vincént anggutina dogén. Apang ngaleganin toris dogén. Apa ya demenina ento alihang.

Indeng-indeng malu ajaka tekén gaidné apang engsap teken bubuh lédok. Ada butik ditu rérénanga. I Vincént mula urati. “Alihang kain rangrang lakar aba ka Australia. Kain cepu masi dadi. Lakar adep ditu.”

Sedeng melaha enu ada kain rangrang lain kain cepu, béh prajani alah sayutin kenehné  I Vincént. Timpalné masi kendel krana belianga kain rangrang. “Buin besik tusing maan? Bubuh lédok. Mai énggalin! Apang makejang bakat rasaang di Nusa Penida, mumpung mai.”

Deduh-geduh gaidné. Tongos madagangné Dadong Ranten tusing sanget joh. Neked di arep warungné, tingalina warungné suba muneban. 7

Olih: