Matepetin Bapa
Sekat matepetin bapa sakit, ampun kanti telu bulan nika, Aru Supat ten maan maléngkas lakar ngunyain Ayu Surat di Linggamanik. Basangalas tanggu kangin ka Linggamanik tanggu kauh, ten té madan joh.
Anak ngalawan bakat lawan, kenyel ya baana mancan nyarik baan ngenemin. Matingtingan abetné Aru Supat. Majujuk Aru Supat di baléné. Nguntuk luten Aru Supat. Gulika bapan Aru Supaté. Ka sisianga di baléné.
“Bané gulik awak wané?”
“Koné ongkeb. Koné lakar mandus.”
“Mandus ya. Awak ongkeb.”
“Gih naké mandus. Apang tis ragan wané.”
“Nah.”
Tingtinganga batis bapan Aru Supaté, gelénténganga luten tekén Aru Supat, mara luten dadi baana Aru Supat mangunang bapan Aru Supaté.
“Mabo gati wa. Wa meju?”
“Sing. Sing makita.”
Aru Supat ngelésang bajun bapanné. Aru Supat ngelésang celanan bapanné. Kayang ka pampers-né gahgaha. “Liyu gati wa meju, nyandang ya wa mabo gati.”
Mejunin. Manyuhin. Ampun ten gati rasaanga. Di sépanané ngentinin pampers, parus luten manyuh, nepud celana, nepud kebat, kanti nepud kasur panyuh bapan Aru Supaté. Kaling meju, manyuh, ampun madaaran napi déréng, kari misi napi ampun puyung basangné, ten kingetan baana tekén bapan Aru Supaté. Bapan Aru Supaté ampun ten inget tekén raga. Bapan Aru Supaté ampun ten inget tekén sira-sira.
Ping telu bapan Aru Supaté taén tekain sakit sanget gati. Ampun kadénang sakitné nika anggona pamamit. Kari maan patulung. Kari maan ubad. Seger baana. Sakitné nika mirib ané makada bapan Aru Supaté ten inget tekén raga? Napi sangkaning pajengahin panak di désan anaké ané makada bapan Aru Supaté ten inget tekén raga?
Adin Aru Supaté ané pinih cerik kadapaten nginepin anak bajang di désan anaké. Brangti wed désané drika. Ten trima wed désané drika. Gebuganga kulkul banjar. Endehina adin Aru Supaté tekén wed désané drika. Jam dasa peteng lebih raosina adin Aru Supaté drika. Tundunga mulihanga adin Aru Supaté, nanghing apang sadéréng lemah ampun teka sejati rangkat mrika. Payu ampun jam dua ngalemahang mara nyidayang majalan masejati mrika, mancan teka baana panyamaan Aru Supaté, mancan pragat baana banten muwah canang pangraos. Mangsegan Aru Supat mangkihan.
Aru Supat ngahgah baju ngahgah celana. Sangkola bapanné. Nyidayang baana nyingal ngajak bapanné ka kamar mandi. Tegakanga bapanné di samping bak kamar mandiné. Ten dadi kelidin, ura tai basang Aru Supaté, tain bapanné ané kari magémé, déréng nyidayang baana ngoncéngin sadéréng di kamar mandi. Ampun ten kari basang Aru Supaté ura tai, mara Aru Supat ngoncéngin bapanné, mara luten Aru Supat mandusang bapanné.
“Nyegseg seduh awak wané,” nengkik bapan Aru Supaté. Di asanglapané engsek baana keneh Aru Supaté. Pesak gati pesu raos bapanné. Celebina yéhé di émberé. Ten madan kebus. Gagodan matepetin anak sakit. Mendep Aru Supat. Bin telung cédok tumpuhina yéh nyem yéhé ané di émbéré.
“Kari kebus, Wa?”
“Sing.”
Siyok-siyokina yéh pandusanga bapanné. Nongos bapanné. Sabunina bapanné makukud. Nongos bapanné. Usuh-usuhina bapan né makukud. Nongos bapanné. Siyok-siyokina yéh langsuhanga bapanné. Nongos bapanné. Caraanga ngarunguang anak cerik baan ngarupaka Aru Supat ngarunguang bapanné.
Di kamar mandi lapina bapanné. Di baléné bapanné salukina pampers, uyakina lengis anget-anget, salukina baju, salukina celana, sangkola jempanganga, saputina luten. Tis ragan bapanné. Tis pasarén bapanné. Aru Supat nyaluk celana, nyaluk baju, nyeluk handphone. Ten wénten chat ané déréng mabaca.
Nyempang luten Aru Supat di samping bapanné. Ten ngidem-ngidem pinghalan Aru Supaté. Yén dadi té tunas, dadi té lungsur, madak ten lemah-lemah guminé. Madak ten endag-endag ainé. Lemah, semengan, buwut gati kenehé. Kén lakar malunang, kén lakar durinang. Kén lakar jemak, kén lakar sampingang.
Ten ngehanga, ten dusina, macliyek pinghalan Aru Supaté. Aris gati pasarén Aru Supaté, patuh cara aris pasarén bapan Aru Supaté. Bapa-panak saling gelut masaré. Tekek majangkut. Ten masaput. Getitem legu ten gati rasaanga. Tis gati pasarénné. Mati gati kiyapné. 7
1
2
Komentar