Demen Kadén

Liu anaké ngorahang ento tongos dedariné masiram. “Miriban ada dedari di gumi wayah cara janiné?” kéto tiang ngrumik didian. Tiang ngasai nyagjagin I Kaki ditu bengong padidiana. Uli joh suba tepukin tiang. Ragané kenyam-kenyem padidi, dikénkénné misi cara ada ané ajaka ngorta. Liu ngorahang pekak tiangé buduh, ulian ngasai ngalih bekel di tongosé tenget. Nanging tiang ngasai ngorta ngajak I Kaki, ragané tusing ja buduh cara anaké ngorahang. Sabilang ajakin ngorta ragané nyambung. I Kaki taler ngasai macanda ngajak cucuné ané lénan. Sakéwala dikénkénné I Kaki mula ngorta padidiana, nanging tiang tusing ja pati rungu.

“Kaki lan jani mulih malu. Suba nyaluk sandikala, nyen paling aliha ngajak I Bapa.” Tiang orahina ngajak I Bapa apanga ngalih I Kaki. Mapan suba lakar nyaluk peteng, I Kaki tusing mulih. Ragané masih tondén madaaran. Anak suba lingsir, pikunné keras gati.

“Yéah! Cucun Kakiné suba teka. Luh, né cucun tiangé ané paling bagus. Adané Madé Musti,” I Kaki buin ngorta didiana marep ka pancoran dedariné.

“Nyén ajak Kaki ngorta. Mai mulih! Énggalan peteng nyen tusing nepukin jalan.” Ngénggalang tiang ngisi limanné Kaki ulian jejeh.

“Nah! Nah! Kedetin malu né kéweh sajan bangun.” Tiang ngedetin I Kaki, sakéwala kondén kedetin tiang Kaki suba bisa majujuk malunan. 

“Suksma nyen Luh! Buin mani buin ngorta.” 

I Kaki matolihan ka samping ané marep ka pancoran dedariné. Tiang tusing ja ngrunguang munyinné Kaki mula kéto. Ada masih kenehé jejeh nepukin Kaki buka kéto. Sakéwala ragané ngénggalang suba ngajakin macanda. Tiang demen turmaning sayang pesan ngajak I Kaki. 

Di marginé tiang mimpas ngajak anak ané nganggon baju selem, kamen selem, maimbuh udengné selem. Bungkungné gedé-gedé di jerijin limanné. Ada keneh tiangé jejeh, sakéwala I Kaki ngisiang liman tiangé ngorahin tiang apang tusing jejeh. Nyerengseng suba tiang ngajak I Kaki ngliwatin anaké ento. Suba lantas joh majalan, I Kaki makenyem sahasa cara anaké ngwalék. 

“Kaki! Nguda Kaki kéto? Kaki kenal ngajak anaké ané busan to?” tiang nakonin sangkan I Kaki kenyam-kenyem.

“Anaké busan ento adané Gedé Ghora. Iya mula ngasai mai, sakéwala tusing taén matemu ngajak dedariné. Iya pepes éndahina ngajak anaké ané nongos ditu. Ulian ia koné demen kadén. Mara ada angin, kadéna ada dedari. Mara ada pakrosok, kadéna masih dedariné rauh. Sing tawanga ia ngorta didiana ditu.” I Kaki nyaurin patakon tiangé. Ulian pasaurné I Kaki buka kéto, buin ada keneh tiangé lakar nakonin.

“Adi bisa Kaki nawang? Ah, Kaki ngaé satua ngawag-awag. Jaman jani tusing ada dedari, cara satuané Kén Sulasih dogén. Nyen Kaki nyemak seléndangné.” 

I Kaki kedék ngakak turmaning nyemak bangkiang tiangé. Tiang geli laut malaib ngénggalang. Buin maniné makejang krama désané maturan. Jani Tumpek Wayang, odalan di pura désané. Tiang nandanin liman Kakiné ngajakin ka pura. I Kaki cara biasané nganggon baju sarwa mamutih, santukan ragané taén mawinten dados balian, kereng ngubadin anak. Ané jani suba lingsir, grayat -gruyut majalan turmaning suba buyutan. Di tongos gambelanné ditu Kaki demen negak sambilanga ningehang gambelanné. Tiang masih milu sekaa tabuh ulian I Kaki demen ningehang gambelan. Kalahin tiang suba I Kaki negak padidiana, turmaning ngorta padidina cara biasané. 

Sedeng itepa tiang magambel, sagétan tukang kendangé ngemang kode mecatang gambelan. Lantas batél gambelanné jani. Sawiréh tiang ngambelin jégog, tongos tiangé siduri. Tiang tusing nawang éngkén paundukané di malu. Liu anaké nyagjagin, tukang kendang lan gangsané padengok tur matolihan ka penabuh ané di duri sambilanga kenyam-kenyem. Tiang majujuk sambilang magambel, tusing ja nepukin apa ulian ramé anaké ditu. Tiang ngalihin I Kaki, enu negak di tongosné malu sambilanga kedék tur mamunyi padidina. Disubané gambelanné suud, ngénggalang tiang nyagjagin Kaki, takut Kaki kenapa-napa. Kaki laut ngomong, “Dé! ditu ada anak buduh mapi-mapi ia karauhan. Sing tawanga anak ia bebainan, éndahang timpal. Sangkal yén kondén cacep, eda malu ngédéngang raga, liu anaké ngéndahang.”

“Sssttt! Eda Kaki ngomong ngawag! Di purané. Uli dija Kaki nawang?” tiang matakon ulian bingung tekén I Kaki.

“Né I Luh ngorahang, timpal Kakiné. Dedari di pancorané ento. Yén sing percaya, kemu suba Madé tolih. Gedé Ghora ané taén maimpas ajak raga ditu di pancorané. Ia suba ané karauhan. Ngaséksék makraik, diastun suba kaketisin antuk tirtha. Antosang nyen buin akejepné ia buin ngaséksék. Luungan suba aba mulihné, yan dini ia lakara ngaduk-ngaduk. Mapan jani kajeng kliwon, sangkal ento babainané kumat,” I Kaki ngorahin tiang nelokin kemu. 

Tiang nyagjagin anaké ramé ento. Saja buka orahanga ngajak I Kaki. Dingeh tiang anaké pakrimik, mula ané karauhan ento madan Gedé Ghora. Ditu tiang mapineh, nyén sujatiné anak buduh? I Kaki ané demen ngorta padidiana ento anak buduh, apa Gedé Ghora ané demen kadén ené?