Mén Bekung
Mirib tusing lakar blabar yéh mata, yén tiang nyak nuutin keneh reramané dugas pidan. Nasiné jani suba dadi bubuh. Makamben di sunduk, jani sabilang wai maselselan.
“Kung, kal kija luas? Suud malu magaé. Masih sing ngelah sentana. Nyén lakar baang kasugihané?” Beli Latra, timpalné Beli Putu dugas SMA nyapatin ragané.
“Pelih pajalan waké, Tu. Belog ngaba awak. Harusné belingin malu mara juang. Yén sing beling, kutang. Sing bekung ukananga,” Pan Parti nyambungin. Beli Putu Réndi tuah makenyem, lantas magedi. Tuturé totonan tusing pesan ngajiang pangrasa tiang dadi nak luh. Sahasa nak luhé totonan tuah dadi palalian tur pacadang kuang. Nagih ngalih asil di untungé dogén.
Pipis maliah, umah méwah ané gelahang mula saja tusing lakar ngaba bagia. Tusing ada ajiné, yén pianak tusing gelahang. Kija-kija mula tusing ja kasugihan ané lakar takonanga. Nanging akuda suba ngelah sentana? Suba kelih apa kondén? Mula ento kasugihan ané sujati.
“Tu, kénkén? Buin pidan lakar ngemaang mémé cucu? Suba dot sajan mémé ngempuin cucu. Suba dot ada plalian anggon mémé baban tua. Ka balian, ka dokter suba, masi tondén ada asil. Yén suba mula Mén Bekung tusing nyidang ngemaang mémé bapa cucu, alihang suba ragané kurenan ané lakar nyidang ngemaang sentana.” Uli selagan jelanané dingeh tiang ortané ento. Tusing nyidang baan tiang nanggehang sakit kenehé. Rasa remuk isin kenehé, sétsét. “Apa Putu kenehang buin? Putu manyama padidi. Kanti suba kutus tiban, Putu ngantén kondén masi nyidang ngemaang mémé bapa cucu. Apa lakar ngantiang mémé mati, mara lakar gaénang mémé cucu?”
Putu Réndi tusing masaut nang abuku. Miribang marasa tekén déwékné mula saja pelih, pelih tusing nyidang ngaénang reramané cucu. Tiang malaib. Malaib mababaan yéh mata. Tuah yéh mata ané satia nimpalin tiang sabilang wai. Dadi mantu ané tusing nyidang ngisinin keneh matua, mula stata lakar dadi titi ngalih pajalanné pelih. Kéné lakar pelih. Kéto masih lakar pelih. Apa jemak panekedné pastika lakar pelih. Mula suba dadi pituduh. Yén ipidan tiang tusing ngalahin Beli Kocongan, mirib sakité tusing ja buka kéné. Nyelsel? Tusing dadi nyelselin tresna. Tusing dadi nilas pajatuh karma.
Semengané ento, gulemé ngaliput jagat. Kopi ané gaé tiang bang matuané, saha buka tusing misi gula rasané. Tumbén pait, pait makilit.
“Mén Bekung, mai malu. Suba dasdasan mati mémé ngantiang pabaan waké mai ngentasin umahé dini! Kayang jani waké kondén masi nyidang ngemaang mémé ajak bapa cucu. Miribang tuah ngebekin umah, nelahang dadaaran waké ngoyongin Putu, ngoyongin mémé ngoyongin bapa dini. Tiang nak cucu ané sujatiné alih. Tusing ja mantu ané bekung buka nyai. Ka dokter suba, ka balian suba. Nanging, tetep nyai sing nyidang ngentikang sentana. Mula saja nyai suba bekung. Anggon apa dini ngingsanang bangké. Jani pilih magedi uli dini, apa nyak lakar alihanga madu baan pianak tiangé? Dugasé uli bajang waké suba nawang dini tusing taén setuju lakar nganggonang waké mantu. Nanging tiang kakalahang ulian raos manis, ulian tresnan nyai, kalawan pianak tiangé,” kéto raos mémé matuané pesak-pesak nyakitin keneh tiangé.
Beli Putu kurenan tiangé tusing ada masaut apa-apa. Bapa matuan tiangé, ané biasa nyayangang tiang, masih jani suba tusing mabéla buka ibi puanné. Mirib suba gantiné jani tiang malaib, ngalahin umah ané taén ngaénang tiang bagia, miwah ngaénang tiang sengsara. Tiang lakar nglémpasin semaya tiangé ngajak Beli Putu Réndi. Suba bek rasa yéh ané sabilang wai maketél, ngetélin gelasé ané putih. Suba pantes jani maléléh. Suba sayaga tiang mlaib ngalihin reramané jumah. Suba misadia tiang ngentosin Mén Bekung di awak tiangé, dadi janda. Diastun ja lakar lebian gedé blabaré ané buin tepuk di sisi, tiang misadia lakar nyalanin.
Nanging setondén tiang magedi. Ada abesik pabesen ané lakar tekadang tiang bang mémé matuan tiangé. Pabesen ané suba kutus tiban tiang engkebang, ulian tiang ngajinin pitresnan tiangé ngajak Beli Putu. Pabesené ento sing ja lén pabesen ibu dokter, dugas tiang maprogram ngaé pianak, dugas atehina baan bapa matuané.
“Mé, Bapa, kéto masih Beli Putu. Suksma ané aturang tiang ngajak mémé, bapa, miwah Beli Putu ané suba miara tiang, nyagain tresnan tiangé ngajak Beli Putu kanti kutus tiban. Mirib suba séh Widhiné, tresnan iragané pacang kapalasang baan tusing ada sentana ané kayun ngrauhin iraga. Ampura pang banget, indik pelih tiangé sareng mémé, bapa, miwah Beli Putu salami niki. Ané jani, tiang lakar magedi ngedinin Mémé, Bapa, lan Beli Putu. Dumogi ja Beli Putu nyidang maan kurenan ané nyidang maang mémé lan bapa sentana.” Di keneh tiangé sujatiné sumandangsaya, yén Beli Putu lakar nyidang ngemaang sentana diastun ngajak kurenan anyar. “Né tiang…..” makiré ngenjuhang surat.
“Depang tiang ngemaagn mémé, luh,” bapa matuan tiangé megatang lan nyemakin surat ané enjuhang tiang.
“Tiang pamit,” tiang majalan.
Putu Réndi ngeling sigsigan lantas malaib ka tengah kamaré. Mémén ipunné rumasuk bagia, mantu ané tusing taén arepanga maimbuh ané tusing nyidang ngemaang cucu jani magedi.
“Né surat asil pemeriksaan pianak lan mantuné,” matuané muani ngenjuhin surat lantas magedi.
Isin suraté ngorahang, tusing ja tiang ané bekung. 7
1
2
Komentar