20 Oktober 2024
Ping kalih ping tiga Gdé Kawi ngebit-ngebitin kalénder I Ketut Bangbang Gdé Rawi, somahnyané Luh Riani ten banget ngrunguang.
“Jangankan awai, ajam amenit sing dadi tawah.”
“20 Oktober?”
“20 Oktober.”
“20 Oktober 2024 to hari Minggu tawang benya?”
“Biar hari Minggu, biar hari bebedag adag, Pak harus minggir.”
“Hari Minggu ngaé upacara resmi?”
“Pang ten wénten kekosongan kekuasaan.”
“Mengganggu hari istirahat orang di hari Minggu.”
“Né mengganggu to malah Bapak sendiri.”
“Mengganggu apa?”
“Mengganggu sistem.”
“Béh tegas sajan.”
“Harus tegas Pak. Yan sing tegas, makejang pejabat makiré léngsér nganggoang kita.”
Muled basang Putu Hasta wit timpal seken malah dados sempal seken, sangkaning Gdé Kawi wong tan tirunan temah pitra, lupa kacang akan kulitnya. Hasta boya jlema éncéh-éncéhan. Doh dumunan ipun mapolitik-politikan cerik-cerikan ring ndésa, nanging téori-téori politiknya wayah.
Bah bangun Banjar Barak riin nyalonang ipun dados perbekel. Ri sampuné dados mekel, alon-alon ngenah kasujatian selem kalawan putihnyané. Kalem-kalem sambuk, augan ngrépét ngrupuk. Dadong Préro sané banget ngogok-ngogokang ipun, riin dagang mébél sisin jalan, mangkin orang nomer satu Désa Nusantari. Dadong Préro sareng Putu Hasta habis-habisan nglemesin, mati-matian memperjuangkan wong ndéso Gdé Kawi, mangkin ri sampuné dados wang kota, ngentutin anak lingsir ipun dadi ati.
“Menék taié ka poloé not.”
“Benya jeg mamedih dogén Hasta.”
“Nyén nak sing mauled basangé ngenot bikas i jantuk totonan.”
“I Kawi? Ia suba bingung padidi jani.”
“Ngacuh munyiné. Ia bingung padidi. Merasa dikejar waktu dikejar kesalahan. Ada dané takutina pesan tekén I Kawi jani-jani né.”
“Apa?”
“20 Oktober 2024.”
“Ia punyah padidi. Punyah tekén jabatan. Makanya ngacuh buduh.”
“Kadung tis jitné negak. Cara sesenggak, kadung suba barak sing makita marun. Suba kadung negak sing makita tuun.”
“Nyak sing nyak, 20 Oktober 2024, tuun.”
Kantos med somahnyané ngaton Gdé Kawi lemah peteng jeg pragat jeg cepok jeg kumuh ngebat-ngebitin kalénder. Notes di betén matané padidi ten tepukina, makejang anaké ampraga kadéna nyelap nyepel. Potlot macelekan di topongné ileh-ileh aliha, makejang anaké uyutina orahanga ngebang. Sané pinih parah, kaca mata nyangklak di kupingné kari anggona ten raséna, makejang anaké grogésa kadalih ngengkebang.
“Bahlul, benya ngengkebang kaca mata?”
“Matan tiangé nu luung, bakal gena tiang ngengkebang kaca mata?”
“Dija kaca mataé?”
“Nika kari anggén Pak.”
Bahlul prémannyané ngoyong-ngoyong kena tampligan. Bahlul masé lengeh. Orahina drika-driki ngeplagan perbekel tiga période, masé nyak. Sampun pasti peraturan undang-undang tan nadosang, masé nyak gebuh drika-driki. Tan wurungan ipun dados upet-upetan, dados bulan-bulan, dados buli-bulian ring masyarakat.
“Ah, né bakat runguang. Kalain mulih terasné, masé ia kal suud menjabat.”
Biasané kukuruyuk ayam tatas lemah Gdé Kawi sampun gras-grus ngopi pait mataluh mica. Sampun nyem mlétég wédang sesagi, surya ngragas wit culagi, ngerok I Jantuk kari kapiragi.
“Beli bangun. Né suba 20 Oktober 2024!”
“???”
1
2
Komentar