Kumangmang
“Dé buin mani Tilem, payu buin mabalih?” patakonné Gedé Ngetis.
“Hahaha… lamun ajak ramé tiang sing nyak!”
“Né mara ja, ajak ramé kan gigisan takut.”
“Yan ajak ramé, mara pesu besik endihané suba sénterina. Buung dadinné mabalih léak mabalap jak léak magulungan,” tiang nyautin sambil kedék.
Mabalih léak uli di duur bukité cara mabalih film layar tancap yan rasaang. Tongos tiangé mabalih ajak Gedé Ngetis madan Bedugul, ditu ada Pura Ulun Suwi ané sungsunga tekén krama subaké. Tongosné baduur, di beténé ada carik linggah misi tukad ajak telabah gedé. Tukadé maka wates palemahan ajak Désa Magetelu.
Nuju Tilem suba biasa tiang ajak Gedé Ngetis ngelah janji lakar mabalih. Tusing maorahang ajak nyén-nyén apang tusing ada nagih milu. Uli jam kutus peteng biasanné tiang suba negak di Bedugul mabekel kebat aji don keraras.
Yan diageté, uli jam sia peteng léaké suba pesu. Uli duur tinglis bakat tingalin nuju apiné pesu uli duur bukité kauh. Tusing makelo biasanné tutuga tekén apiné teka uli kelod, dikénkéné sagét masi ada api teka uli kaja kauh. Demen tiang mabalih endihan apiné mauber-uberan duur tukadé, buin jebosné lantas magapluk dadi besik laut sunaran apiné sempyar pagluluk di tengah padiné. Yan suba magulungan makejang ada masi rasa inguh yan endihan apiné ento lakar ngalih tiang padaduanan beneng kangin di Bedugul. Takut-takut bani mabalih kakéto.
Ulian suba ngelah janji lakar mabalih ajak Gedé Ngetis, sanjanné tiang maorahan tekén I Bapa.
“Bapa, nyanan tiang lakar mabalih endihan buin uli Bedugul.”
“Né mara anak cerik pengkung, tusing dadi orahin acepok. Eda sajan nyemak gaé soléh-soléh,” saut bapan tiangé misi nengkik.
“Akesep dogén pa, apang tawang akuda ya jani pesu?”
“Né anak cerik tawah. Kumangmang ento tusing ja palalian. Ento anak tonya ané marupa punggalan sirah dogén. Bokné ngendih cara api. Bapa ajak pekak Madéné taén malaib uli abiané. Munyinné cara ulungan nyuh aijeng, bapa ajak dadua nyagjagin ulian lega kenehé maan ulungan nyuh. Buin kejepné jek punggalan- punggalan duén ané tepuk ngendih malaib menék ngodkod punyan nyuhé. Bapa ajak pekak Madéné kanti patilangkeb malaib.”
Serem sajan bapa nuturang ngaé tiang takut.
“Arah Bapa nakut-nakutin tiang apang tusing mabalih. Anak ané tepuk tiang uli duur tusing ja punggalan, nak tuah api cenik.”
“Nah, Madé jek campah duén yén orahin bapa. Paling melah nyanan tutug bapa mancing di telabahé sambil nyundih lindung!”
Makelo tiang tusing masaut. Di keneh anak suba nyanéh lakar mabalih ajak Gedé Ngetis, suba tungkasina baan i bapa, paling melah tuutang munyinné apang tusing nepuk sengkala.
“Nah pa, kéwala tiang tusing nyak majalan di duri,” saut tiangé sambil kedék.
“Lan jani masaré malu apang nyanan tusing kiap.”
Uli jam lima sanjané bapa suba makupuk nyayagaang sundih strungking, nyangih perabot, mersihin dungki tur ngakit pancing. Bapan tiangé mula buduh mamancing. Tusing taén marasa takut luas mamancing padidi. Koné ulian pamales pancingné malakar aji pugpug tugelan tengala. Lakaranné baan malingin di jro baliané, ento koné makada bapa takutina ajak kakétoné di kapetengan.
Disubané makejang sayaga, jam kutus peteng tiang majalan luas mamancing padaduanan. Tiang majalan di malu ngaba praboté, bapa nutug uli duri nadtad sundih strungking magegaman arit lanying lakar angona macok bé yén nuju tepuk di tukadé utawi di telabahé.
Majalan tiang nuju kelod kauh di Tukad Pangi. Negak saling ejohin apang tusing talin pancingé makilit. Selat limang menit tiang makipekan sé bapané jejeh kalahina.
“Bapa, ada sundih prakpak uli kelod tekanné.”
“Anak ngalih balang miribné, mun sing ngalih balang sinah ngalih jangkrik.”
“Bapa, tusing ja prakpak ento, mirib sundih strungking masi. Sayan paak sayan ngedénang”
“Nah siepang, antosang nyanan sinah neked dini.”
Komentar