Kumangmang
“Dé buin mani Tilem, payu buin mabalih?” patakonné Gedé Ngetis.
Pliat tiangé nelektekang sundihé ané tekané uli kelod. Sayan makelo sayan paak, sayan ngedénang. Pajalanné masi sayan becat. Mara kipekin bapa, sagét sundih strungkiné matianga.
“Dé, saréang awaké! Diolas da nyan mamuanyi apa-apa. Nyanan yan suba paak, tekep cunguhé da maangkihan, to tusing sundih nak kumangmang ané lakar liwat.”
Tiang tusing masaut baan naanang takut. Telah mapelutan bulun cikuté rasaang tiang. Sayan paak sundihé ento. Nah, jani suba lakar seken-seken nepuk kumangmang.
Disubané paek, sing kodag-kodag rasa takuté di awak tiangé maimbuh bayuné runtag tur ulun atiné ngadur-dur. Kumangmangé ento liwat di duur awak tiangé. Saja cara munyinné i bapa, sundihé ento tuah punggalan dogén. Uli di baong bolong, bokné ngendih cara api. Apiné makatistis ulung ka betén. Kuda baan apang tiang tusing maangkihan dugas beneng sirah tiangé ungkulina jak kumangmangé. Makelo-kelo pajalanné sayan joh beneng kaja lantas ilang tusing tepuk tampakné.
Disubané ilang, gulung tiang talin pancingé laut majalan maekin bapa. Suud suba mancing tusing lakar maan apa-apa.
“Lacur Dé, strungkingé tusing nyak idup. Kangoang jani mulih ngarépé. Sénteré masi tusing nyak idup,” raos bapa cara anak ngangsur.
“Mai mulih pa adéng-adéngin. Rasané tepuk margané ulian sasai suba entasin.”
“Mirib suba molas menit majalan ngarépé, mara teked baan di tanggu kaja Tukad Panginé. Lega kenehé ulian margané suba élah, sisin telabahé suba marabat beton, élah yan entasin batis.
“Bapa bapa, buin ada kumangmang teka. To uli kangin tekané.”
“Béh saja, lan marérén malu dini, apang tusing bakat tomplok nyanan.”
Makelo-kelo sundihé ento beneng ka tengah cariké. Ditu ada kubu cenik ané biasané angona tongos maémbon Kaki Padang nuju ujan di cariké. Ulian suba paak, tatas baan sundihé ento tusing kumangmang.
“Beli dini suba kanggoang, tusing ada anak lakar nepukin.”
“Nah Luh, adéng-adéng beli nu ngelésang jalér.”
“Beli sedeng luung ada somi, dini kangoang.”
Bapan tiangé sayan paak negakné, sambila magaang sambila ngintip anaké ento.
“Naaaa…. jani suba, jani suba,” bapa nengkejut majujuk jerit-jerit sisin telabahé.
Ningeh bapa jerit-jerit, anaké ané padaduanan di tengah kubuné malaib patilangkeb di tengah-tengah tebihané. Sagét dingeh labuh maclempung ka enduté, ané luh kauk-kauk tusing runguanga tekén ané muani. Melahné pada-pada ngaba sundih sénter.
Tiang tusing nyidaang naanang kedék nepuk unduké ento. Rasa takuté suba ilang. Adéng-adéng tiang majalan ajak bapa.
“Bapa, uli reng munyinné, tepuk baan bapa ngingetin nyén to?”
“Bah, tusing tatas baan Madé?”
“Tusing pa, mirib ulian takut tiang tusing seken madingehang reng munyinné.”
“Bapa, seken nepuk ané muani dogén.”
“Nyén to pa?”
“Hahaha…. ané muani bapané Dé Ngetis.”
“Badah, berarti ané dadi kumangmang to bapanné Dé Ngetis Pa?”
“Adah, cocok suba Madé nu cerik, tondén nyidaang nyepih kén ané kumangmang seken, kén ané kumangmang matah. Hahaha…..,” kedékné bapa mirib kadingehan neked di marga aspalé.
“Artinné kumangmang ada dadua, Pa. Kumangmang lebeng ajak kumangmang matah, kéto?”
“Badah, lan mulih éngalin, hahahah!”
1
2
Komentar