Kotak Kosong
Wara-wiri tan jenek-jenek malinggih ring kursi sané polih ngawé sugih, pastika wénten pikobet mabuat sané nyandung, tan sida antuka ngrereh pamandung, wastu ipun bingung.
Kantos wadih Luh Laksmi miragiang somahnyané ngomong, setata mligbagang kotak kosong. Sedek makalihan ké sapisanan ring gedong, anak istri nyongsong pacang kagosong, magandong nyalukin barong, kama bang kama putih kabongbong, jalu wadu mapadu bokong, némpong manyong bolong. Méng méong-méong, sang mong bengong cara longgong.
“Tolong… tolong… tolong…!”
“Beli, beli, beli. Kénkén né beli katulung-tulung? Ngipi?”
“Aa.”
“Suba daslemah beli ngipi.”
“Aduh, jelék sajan ipiané.”
“Sing ada jelé melah. Tuah bungan pademan. Beli bas tuyuh.”
“Jelék, jelék, jeléééék…”
“Terus ngorahang jelék. Apa ipiang beli?”
“Uber kotak kosong.”
“Atah…”
Saling tan rungu silang ten renga. Luh Laksmi tan ngitung kurenan, Gdé Bawa tan ngétang somah. Luh Laksmi ngomél ring soulmate-nyané.
“Males ngelah kurenan kéto.”
“Ké harus sabar.”
“Suba serahang awaké matah-matah, apang ia ngamah motah, antosang kanti ngutah, sing ada lintah ngentah.”
Ring pegawéné Gdé Bawa ngamuk, ring kakanténané ngrumuk, ngorahang ati ibuk kadi katebuk, uber kotak kosong masepuk. Jejeh ipun ring sané kosong élah antuk anaké nagingin kanti bek. Duaning kotaké kari kosong, élah aluh antuk nyegsegin.
“Bahaya né. Kotak kosong bisa bek. Jejeh atié.”
“Da jejeh tekén kotak kosong, asal…”
“Asal…?”
“Asal otak sing kosong. Yan kotak kosong, lawan baan otak kosong, ya pasti kotak kosong dané menang, kotak kosong bisa bek.”
“Perlu nyéwa lawan, apang tusing nglawan kotak kosong?”
“Maksud benyaé apang cara di Jawa, nyéwa lawan, tukang jahit anggon calon walikota, apang sing nglawan kotak kosong?”
“Dané pikir cang, yan petahana kalah nglawan kotak kosong, ambat lek atié?”
“Makané da kanti kalah!”
“Da baanga kotak kosongé kanti bek, becatang otaké apang bek maluan! Kotak kosong da lawana baan otak kosong!”
“Suba, suba ngerti cang.”
“Ah ngerti, ngerti, masé benya nu dogén bingung padidi. Dini ditu ngrumuk, benya cara tong kosong.”
“Di pelihé gén tongos cangé. Yan nengil pelih, orang benya otak kosong. Ya liu munyi masé pelih, orahang benya tong kosong.”
“Kotak kosong sing dadi lawan baan tong kosong. Tong kosong to omong kosong. Liu ngomong tetapi kosong.”
“Sedikit bicara banyak kerja?”
“Maling ngelah gaé to, Cénk Blonk kéto. Benya nyak dadi maling? OTT terasé.”
“Banyak bicara banyak kerja?”
“Dalang koné ngelah gaé to. Benya nyak dadi dalang, apabuin dalang kerusuhan.”
“Béh.”
“Taya mara ya katresnan, biaktékang taya katemu. Ngerti to?”
“Sing. Omong kéweh to.”
“Apa yang kau pikirkan, itulah yang kau dapatkan. Yan terus benya berpikir kalahanga baan kotak kosong, ya benya lakar kalahanga baan kotak kosong.”
“?” 7
1
2
Komentar