Barongé Atugel
“Yan manjus Yan…!”
“Nah, tingalin odalan ring Pura Puseh, awaké ané lakar andupina, awaké ané lakar ajumina tekén krama banjaré,” kéto di kenehné Tut Karud krana ia maan ngigelang barong di duri nganti jani tusing ada ané ngajumang igelané.
Disubané liwat piodalan di Pura Dalem, nuju lantas rahina piodalan ring Puseh, sakadi biasané cerik-ceriké buin lakar mlajahang ngigel. Wayan Kacir ngajak Tut Karud suba ja sakadi biasané buin lakar maadungan lakar ngigel buin, né jani baanga lantas Tut Karud mlatih dadi barongné di mukak.
“Tut, sing kéto igelané, pelih cai!” Yan Kacir ngorahin krana igelané benyah.
“Ah… mula kéné ané beneh!” Tut Karud ngrasa suba duég maigelan, diastun igelan barongé benyah kadi cicing tamplig motor.
“Yén kéné lakar ngaé lek ajak banjaré, igelan barong benyah kéné,” kéto isin kenehné Yan Kacir.
Disubané lantas dinané lakar péntas, sakondén lakar masolah barongé, ditu Yan Kacir ngrasa yén baanga Tut Karud di mukak, sinah lakar benyah igelan barongé, sinah lakar lek jak banjaré. Ditu ia nagih buin apanga tetep ia ané di malu krana suba kadung luwung igelané.
“Tut, seken cai bisa? Cang dogén suba baang di malu nah, cai kanggoang di ikuh cara biasané!”
“Yih… dadi kéto, uli dugasné cai suba majanji ngorahang maang awaké di malu buina awaké suba mlatih.”
“Sing kéto Yan, yén kéto ajak dadua lakar lek atiné ngajak banjaré.”
“Igelan awaké suba luwung, cai di duri dogén tuutin igelan awaké!”
“Badah… Cai mula jelema bengkung, cang di malu!”
“Icang di malu, cepok-cepok cai di duri!”
“Ah.... Cai mula jelema bengkung, nah yén kéné ngigel suba ci padidian! Kéwala barongé getep cang, tusing nyak cang milu, apabuin ortanga nyanan, tusing nyak lek cang ulian cai!”
Kaliwat gedegné Yan Kacir krana Tut Karud tusing nyak nuutin kenehné lantas ikuh barongé ané di duri getepina lan kalahina abana mulih. Krana suba lakar masolah, payu ditu Tut Kerud ngigelang barongé buntut tusing maikuh, krana ikuhné kaaba mulih tekén Yan Kacir. Banjarané pabriak ngedékin krana igelané jelék srandang-srendéng tur barongé buntut tusing maikuh.
***
“Pihhh... jeg aéng sombongné Ketut Kerud to! Nyén maadan kéto kak?”
“To… adané…!” pekakné Yan Stone makenyem padidiné.
Kilang-kileng Yan Stone ningehang satuan pekakné unduké krana ada barong pegat di gudangé ento. Disubané bakatanga HPné laut ia malaib melali pesu.
“Kal kija Yan?”
“Kija men bin? Lakar mabar lah, ngajak timpal di rurungé!”
Kéné suba cerik-ceriké jani tusing ada inget tekén tutur rerama ingetanga tuah mlali, maplalian ngajak main HP dogén. Miribang suba bedik kenehné ngwarisin seni lan budaya Baliné. Pekak Ston makeneh-keneh padidiana sambilang menehang tongos barong ané atugel ento krana inget barongé ento kenangané ipidan ngajak timpal-timpalné cerik. Sagétan Wayan Ston teka buin.
“Kak dadi silih barongé? Lakar igelang ajak timpal-timpalé!”
“Dadi Yan.”
“Jani kel jemak.”
Wayan ston nyemak barongé sambilanga malaib abana ka rurungé.
“Yaaaan... Ingetang alih ikuhné di umah Pekak Keciré!”. 7
Olih: I Wayan Nuryana
1
2
Komentar