Sari Ngantén Ngajak Keris

Kawitné Mék Luh, méméné Sari sangsaya, “Kenapa ya, pianaké dadi kondén mén, nah? Né suba 3 bulan kanti.” Sotaning dadi mémé, ia inguh nepuk unduké. Ia ngrasaang ada ané tuara beneh kaalamin baan pianakné. Ditu lantas ia ngalih Sari di kamarné. Ia ajaka ngorta uli raos kodë. Makelo ia ngalemesin Sari apang nyak ngorahang pikobet ané alamina. Katuyuhané tusing rugi, Sari lantas maang kodë ia saja kondén mén.

“Ratu bhatara!” méméné madeepan sumangsaya. Ia tusing ngadén pianakné kanti 3 bulan kondén mén. Biasané, yén telat, paling 2-3 wai doén. Selanturné, buin majalan sakadi patuté. “Musti tekedang unduké né ajak bapané.” Ia ngrumuk inguh.

***

Anak luh matuwuh sawatara 45 tiban ento lantas nyagjagin kurenané di ampik umahné. Kurenané sedek lengut matuakan nyambi ngroko. Ia ngarasa demen tekén aab petengé, yadiastun dingin. Bulané mengkeb di betén ambuné. Besik dua, bintangé samar ngenah masunar. Munyin balang di selagan punyan kayu lan munyin jangkrik dadi pangeramén wawidangan désané. Nah, kulawargané né mula idup ngempi di tengahing abian salak. Jarak umahné ajag pisaga majohan.

“Beli, ada ané sarat musti tiang tekedang,” Mek Luh masedek.

“Tumbén gawat gati ortané. Cara kurenan pejabat doén, ngaba orta penting. Sujatiné, ada apa?” masaut anak muani to bangras. Muané barak. Minab pamerat tuaké suba ngrayangin getihné, uat-uat sirahné. Ia ngisep roko, lantas nolih langit. “Sambatang Luh, apa ada penting ané lakar Luh tekedang?” Ia nglantur ngaraos, misi nengneng muan kurenané.

Nepuk parisolah kurenané buka kéto, Mék Luh malikang mua.

“Sari, pianaké ….”

“Ada apa ajak Sari? Ia seger-seger doén.”

“Pangenahné doén seger. Sakéwala….”

“Sakéwala, kénkén?” anak muani ento matakon matadah keras.

Ningeh munyin kurenané buka kéto, Mék Luh matolihan tur nelektekang muan kurenané.

“Pianaké, Sari ….”

“Tusing pianak icang! Ipidan icang beling?” masaut kurenané lantas kedék. Ius tuaké suba madingang kenehné. 

“Tiang ngraos seken né beli. Sari suba telu bulan tusing mén,” buka kéto munyiné Mék Luh.

“Kenapa men yén tusing mén? Masalah?” matakon kurenané ingan.

“Terang masalah. Bisa dadi masalah gedé. Né ngaletehin iraga, masi ngaletihin kulawarga gedé iraga,” masaut Mék Luh.

Anaké muani ento nu masih lengut nginem tuak. Ia cara anak tusing rungu tekén pisadok kurenané. Masalah ané tekedanga baan kurenané, cara tusing milu ia ngelah urusan. Sambila makpak kacang magoréng, lantas buin nginem tuak. Ia mataag, bagia.

Nepuk solah kurenané buka kéto, Mék Luh lantas macelep ka kamar. Ia bengong. ngenehang unduk pianakné, nasib déwékné maan anak muani buka kéto.

“Ah, pajalan idup!” Ia madeepan, nyerah tekén keadaan kulawargané. “Minab ké Sari beling? Masak, sih? Yén saja, nyén ané tusing ngelah pangrasa malaksana buka kéto?” Ia ngrimik, sambila nuléngék langit-langit umahné ané saderana. Pikenohné malingser kema-mai. Nyén sujatiné ané malaksana? Sari kapah magola. Buina, umahné joh ajak pisaga.

Galah nyansan peteng. Angsengan guminé dingin nulang. Mék Luh lantas ngidemang paninggalan lantas masaput kamben. Anak luh ané suba tua ento leleh. Leleh awak, leleh pikenoh. Ia pules mabekel keneh simuh.

“Waaawo, waawooo, wawooo!” Mék Luh sagét mireng munyi uyut uli kamar di sampingné. Ia nawang, nyén ngelah munyi ento. Ia lantas ngedatang paninggalan. Ngénggalang ia bangun nuju kamar pianakné. Mimih déwa ratu! Mék Luh nepuk kurenané pules di sampingné Sari. Getihné prajani marasa menék ka polo.

“Hééé, Cakluk! Ngujang iba dini? Ka kujang iba pianaké?” Mék Luh matbat cicingang kurenané ulian gedegné.

“Icang dot pules ngajak Sari. Apa ké tusing dadi icang pules ngajak pianak padidi?” Masaut anak muani ento, sambila mangunang déwék lan negak di sisian balé.

“Mara tunian ngorahang Sari tusing pianak cai, jani sagét suba raos cainé. Buina tumbén cai ngalih tongos pules mai. Ada apa?” Mék Luh néngténg kuping kurenané lan maid pesuan.

Nrima parilaksana buka kéto, anak muani ané suba tua ento lantas pesuan kamar. Kanggoanga ia nyempang di ampik umahné. Angsengan dingin nyluksuk nulang, tusing karenguang. Ia mamilih mendep, lan mapi-mapi tusing ningeh océhan kurenané. Nolih parisolah kurenané buka kéto, jani Mék Luh mamilih nongosin Sari. Ia nylantah di sampingné Sari.

“Ampura, Mék Luh! Mémék ampunang makesiab. Niki nak seken ….” Kondén pragat bidané ento nugesang satua, Mék Luh suba ngénggalang masaut. Minab ia suba dot pesan nawang paundukan pianakné.

“Punapi hasilné Bu Bidan?” matakon Mék Luh.