Ulungin Bulan

“Mapecat Dék. Dija lakar beli ngalih tongos magaé buin?”

“Ah… Bapak tiangé anak polos. Padalem beli Gedé bolak-balik ngawai. Buin mani semengan, nika mobilné bapak anggon apang gigisan beli Gedé leleh!”

Di kenehé mara marasa tiang yén Dék Ayu anak polos. Pelih tiang ngelah rasa ngorahang pianak bos tiangé anak bajang sombong tur judes. Rasa tusing joh malénan tekén beliné ané suba biasa ajak tiang matimpal uli makelo polos tur demen matulung tekén timpal.

Buin jebosné Dék Ayu ngalahin tiang padidi mabalih TV. Orahina tiang apang masaré di kamar beliné. Ulian suba biasa masaré di betén, tusing marasa tekén dewék maseliek kanti pabaliha tekén TV ané ngamélmél makalemah tusing ada nak ngarunguang.

***

Duang minggu makalonné tiang ngijengin Dék Ayu, kénkén kadén undukné di keneh tiangé ada rasa liang yén tiang macepuk. Yadiastun tuah maan nutur-nuturan ajebos, mabunga-bunga rasaang tiang kenehé. Kéwala tiang marasa tekén déwék tuara, suba maan magaé di béngkélné Pak Hérman duén tiang suba marasa bagia pesan. Tusing pesan bani tiang lakar nekedang isin ati tekén Dék Ayu, depang suba tresnané tuah mati di rasa.

Sawatara ada jam satu, Pak Hérman teka ka béngkél tumbénan ngajak anak cerikné Kadék Ayu. Tiang dugas ento sedeng mapeluh-peluh mara suud nyervis mesin mobil pasuhé. Muané marasa tebel sinah suba liu misi lad oli. Kadék Ayu kenyem-kenyem ningalin tiang.

“Gedé, Bapak lakar kundangan jebos ka Gianyar, ada timpal ané ngantén ditu. Ayu lakar kalahin dini, buin jebos yén nagih mabelanja, Gedé ngateh!” kéto raosné Pak Hérman.

“Nggih Pak, dados tan sareng kundangan, Dék Ayu?”

“Anak nu mapakaian masuk tusing ngaba pasalinan. Mara bapak nyemput uli masuk, di umah Jimbaran anak suung. Ibu ada acara masi ajak timpal-timpalné.”

Pak Hérman lantas ngalahin tiang lan pianakné magedi. Dék Ayu lantas matilar ngalahin tiang nuju ka umahé di malu. Tiang tuara rungu buin ulian gagaéné liu tondén ada pragat. Timpal-timpal ané ajak tiang magaé masi makejang suba pada ngamong gegaén padidi-padidi.

Tumbén sanjané ento disubané béngkélé matutup tiang ngalanteng mersihin awak. Suud kayeh lantas negak di malun bédéng tongos biasa tiang masaré ngijengin béngkél. Adéng-adéng pesan Dék Ayu teka maekin tiang. Kadi kapupungan tiang bangun patikaplug. Ada anak bajang jegég maakin, tan kadi-kadi runtag bayuné.

“Wiiihhh…. beli Gedé bengong nggih, pasti wénten ané kangenina?” Dék Ayu sagét suba majujuk di malu.

“Ah Dék Ayu… Ampuraang beli Gedé tan sajan inget wénten Kadék driki. Kadong iteh magaé engsap tekén pabesen bapak. Man napi tumbasang beli mangkin?”

“Ten beli, tiang nak ampun ngajeng tuni di kantin. Tingalin tiang uli malu beli Gedé bengong, takutin tiang beli engsap kén raga,” raosné Dék Ayu sambila makenyem.

“Beli bengong ulian inget tekén i bapa jumah. Ampun telu bulan beli magaé driki, makita masi beli mulih nelokin rerama. Beli tuah enu ngelah bapa duén, marasa kangen beli, jejehin i bapa gelem tusing ada nak nawang.”

“Tunasang ring Ida Sang Hyang Widhi, mangda bapan beliné selamat tur seger. Becikang beli Gedé ngidih ijin ajak bapak lakar mulih nelokin i bapa, miribang kaisinin pangidih beli Gedéné.”

“Nggih Dék, malih jebos lakar satuaang beli unduké tekén bapak Kadéké.”

“Nggih beli, becikang terus terang ajak bapak.”

“Men Kadék driki makasanja, tan nyanan ada ngalalinin mulih? Apabuin jani malam minggu, galahé luung lakar malali ajak tunangané.”

“Badah beli Kadék pasti ten nawang, tekané Bapak uli Jawa tiang orahanga suba kajatukarmaang ajak pilihanné Bapak lan Ibu. Nika ké ngranaang tiang tan bani kija-kija buin.” Tingalin tiang yéh paningalanné Dék Ayu matimbengan.

“Men kénkén, Kadék nerima kajodohang?”

“Tiang ten bani singsal tekén rerama, beli. Tiang percaya Bapak lan Ibu sinah suba ngelah papineh ané melah.”

Rasa runtag di kenehé ningehang raosné Dék Ayu. Tusing madaya tekén unduk, ri kala tumbén di keneh tiangé mentik bibit tresna tekén anak luh, sagét ané ada di keneh suba lakar ada ngelahang. Sing sida baan tiang nyambatang sebet kenehé dugas ento. Tusing marasa liman tiangé magemelan anggon nguleh-ngulehang sebet kenehé.

Sedeng bengong mapangenan, sagét Pak Hérman suba majujuk di sampingné Dék Ayu, lantas negak di samping tiangé.

“Ayu, meriki negak samping Bapaké!” raosné Pak Hérman. Buin jebosné Ayu lantas negak di sampingné.

“Ayu, anak muani pilihan Ibu lan Bapak ané sambatang dugas petengé nika tuah Gedé,”

“Sira Pak? Gedééé….,” Ayu nelik marep ka Pak Hérman.

Ayu lantas cara anak uyang paling di pategakan. Tusing sida baan nyambatang keneh tiangé ané jani.

“Men Ayu kénkén, nyak lakar ajak beli Gedé?”

Tinggalin tiang muanné Ayu barak biing, kéwala buin jebosné maanggutan.

“Bapak, Ayu memang suka sama beli Gedé.”

Suud ningeh Ayu masaut kéto, tiang suba tusing inget tekén dewék. Nyelélég tiang di témboké, aget lan lacuré mula tusing dadi palasang. Jani lakar selélégang keneh tiang tekén Dék Ayu, tusing madaya i déwék maan ulungan bulan. 7