Mén Mudri Madagang Darling
Saniscara Kliwon Wariga, rerainné matumpuk, Kajeng Kliwon misi Tumpek Uduh. Uli semeng Mén Mudri suba cagcag cigcig, kemu mai magarapan kanti suba pragat nyemak gegaén mabanten Kajeng Kliwon lan nguduh tetaneman di tegalan ipun. Ada punyan durén, nangka, buluan, timbul, wani mentik ditu.
“Kaki-kaki, dadong jumah, tiyang mapengarah buin selaé dina galungan apang mebuah nged.... nged... nged.....” buka kéto mantra caconténgan Mén Mudri, mantra tetamian uli i mémé, dadongné, kumpiné Mén Mudri.
Suwud mapailehan nyemak gegaén lan mabanten, kéto masih basangné suba misi nasi bungkus, ané jani, ada nyet Mén Mudri lakar malali ka kota, mumpung ada waktu luang. Masliahan kejep apang ada masih hiburan idupné. Ia suba nyambatang tekén mantuné I Gedé Semara Dwija apang atehina, magandéng negak motor ka kota.
Sawetara jam 6 soré, ia ngesir kagandéng baan motor matic. Angob keneh ipun ngantenang kotané jani. Katonang ipun perubahan kotané jani, sekadi lampu penerangan jalané ngerédép maprada, sabilang tiang lampu misi lampu telung tumpuk, putih nyalang, bunter-bunter buka bulan purnama di sasih kapaté.
“Stop…stop…. stop, uwup dini malu,” kéto Mén Mudri nyambatang tekén mantuné, sambilanga ngedig-ngedig tundun I Gedé, apang tuwunanga di sisin jalané, pas di arep proyék pasar kabupaténé.
“Kénkén Mé, adi stop dini? Mémé nak kabelet ngenceh? Tahan malu kesep, ditu badauh di seberang taman air mancuré ada Pos Pol PP misi toilét, nak dadi silih toilétné, barés tur ramah-ramah petugas jagané!”
Inget I Gedé, ipidan enu ramé “kar pri dé” né dugas satondén wabah Covidé, ngelah ia pengalaman nyilih toilét ditu.
“Apa petang cai Dé?” Mémé tusing kebelet ngenceh. Mémé dot mabalih, apa ja totonan cara badé tegeh ngolét, malinder baduwur sliwar-sliwer misi lampu.
“Oh…ento madan tower crane Mé, alat-alat proyék, apang aluhang magaé, apabuin ngangkat barang-barang berat.”
Mén Mudri kitak kituk, angob tekén kecanggihan teknologi zaman janiné. Kipak-kipek muané nuwutin alat-alat beraté magaé. Ditu, ipidan, di tengah pasaré ané nedeng magaburan jani, Mén Mudri madagang bé pindang. Karana ada proyék, magingsir ia ngalih tongos elénan. Tusing taén ia ngelah keneh sangsaya, karana suba maan nomor madagang yéning pasaré suba grand opening. Koné ia lakar tetep maan tongos madagang di pasar pusat kotané ento.
“Mé… Mémé, suwud monto melamun mabalih lampu, mai mulih, dedauhan suba ngancan wayah. Né suba jam kutus. Padalem cucuné pacruwét ngantosang gapgapan. Mai meli godoh ditu dajané, di samping toko jam tangané, sik Mas Lupi langganan cang,” I Gedé ngedeng liman matuané.
Sambilanga nyebrang jalan nuju dagang godohé, I Gede terus nyatwa. “Jani Mémé harus malajah madagang daring nah! Nyanan belianga ja hapé android. Cucuné Luh Suratni orahin ngajahin adéng-adéng.”
“Apa madan madagang darling, De?”
“Aruh…. Mémé, daring Mé, tusing ja darling. Yén darling i love you, mara ada. Daring ento singkatan uling kata dalam jaringan. Bahasa Inggrisne online, madagang di internété to.”
I Mémé masih bengang bengong tusing ngerti tekén satwa mantuné.
“Zaman jani anaké ngorahang madagang di olshop alias online shop,” I Gedé nglanjutang satuané.
“Aruuuuh… pusing Mémé ningeh satuan cainé. Ané tunian madagang darling, ané jani madagang ololsop. Apaké Ololsop to madagang makanan? Ngolol ajak ngesop? Madagang saluwiré makanan ané gebuh-gebuh, ané makuah-makuah? Apang tusing misi makinyukan, tinggal olol… sop… olol… sop, cara nginem daluman utawi naar ongol-ongol, kéto?”
“Aruhhhhhh…. Mémé. Adi icang ané pusing jani?”
Disubané di arep rombong dagang godohé, Mén Mudri nyambatang meli godoh. “Godoh sepuluh ribu, Mas Lupi.”
Dagang godohé planga-plongo, kilang-kileng, tuara ngerti artin godoh, lantas ia masaur, “Mbonten wonten Bu, pisang goréng kerso?” 7
Komentar