Sekaa Léak

“Mihh… magending I Putu. Dini negak, Tu! Jeg kéné ba ngelah cucu kids jaman now, HP dogén pecik!” I Kaki bangras ngorahin cucunné.

Ngéncolang Putu Nadi maekin pekakné tur negak di sampingné. Putu Nadi anak cerik sané ményél pesan. Sabilang wai ada dogén patakoné, matakon kéné matakon kéto. Adi bisa kéné, adi bisa kéto. Jani Putu Nadi bengong nepukin pekakné.

“Lakar matakon apa, Tu?” I Kaki suba nawang cucuné lakar matakon yéning gobanné cara kebo mabalih gong buka kéto.

“Kaki, kaki, apa dogén pagaén Kaki dugas truna? Nganggurin Nini dogén?” matakon Putu Nadi sambilanga nginum kopi pekakné.

“Adahhh… Kaki nak ngelah sekaa nawang, Tu!” saut I Kaki sambilanga ngajumang awak.

“Sekaa? Cara gangster kéto, Ki?”

“Yéhhh… sekaa Kaki limited edition nawang! Sing ada né bani tekén sekaa Kaki!”

“Men jani suba bubar sekaané, Ki? Adi Putu sing taén nepuk Kaki sangkep.”

“Aa suba bubar, Tu. Sasukat negara api menyerang,” saut I Kaki, paningalanné joh sawat.

“Mai naé nyatua, Ki! Putu dot nawang unduk sekaané ento.”

“Sedek dina anu…..” lantas I Kaki nyatua.

Kacarita gumi Baliné suba serba canggih. Jani makejang suba ada di handphone. Kal ngalih gatra up to date, ngalih timpal, ngalih bajang jegég, jeg makejang ada! Yadiastun jamanné suba canggih, krama désa tetep pageh nglestariang adat Baliné tur satata precaya gumi niskala. Dugas pidan ada sekaa ané jejehina tekén krama désa, madan ‘Sekaa Léak’.

 

“Wéééé… mai makejang ka posko, lakar sangkep Kajeng Kliwon!” kéto pasuruh manggala sekaa di grup WhatsApp.

Léak jaman jani nak suba gaul, nuutin aab jagat. Cara apa ja to adanné nah? Aaaa... melék téknologi! Malénan tekén ipidan, liunan salah tampi ngemaang orti. Orahina tengah lemeng, dingeha Buda Cemeng. Orahina ngaba sanggah cucuk, dingeha téh pucuk. Ipidan kramané satata ngorahang léak to kuno, jani léak to jaman now! Léak ané dumunan satata nyakitin anak, nanging sekaa niki satata nulungin anak, satata nyaga alas, lan rajin menabung.

Sekaa Léak satata nglaksanayang sangkep Kajeng Kliwon. Sekaa niki ngelah struktur organisasi sakadi manggala, juru panyarikan, juru raksa, miwah sisia. Ané dadi manggala tuah léak ané ilmuné suba tegeh, madan Ki Jrimpit. I Kaki dadi juru penyarikan ditu. Sekaa Léak ngelah posko betén punyan kepuh di tengah alasé sané kaadanin Posko Alas Arum. Ditu tongos léaké sangkep, magending, ngegosip, nobar, mabar, bin besik jogét tiktok.

“Ba makejang ada dini?” matakon Ki Jrimpit tekén sisiané.

“Sampun, Komandan!” masaut sisia-sisiané.

“Nah, jani icang kal ngraos penting unduk invéstor asing. Dangin alasé ené icang nepukin liu ada mesin gedé-gedé. Mesin to asané lakar anggona ngusak alas, ngusak posko raga!” kéto raos Ki Jrimpit sada bangras.

Sekaa Léak satata nyaga alas niki apang poskoné tusing usak. Genah Alas Arum madampingan tekén Désa Ngalub. Nanging, krama désa tusing demen tekén sekaa léak tur setata mapisuna apang sekaané ento ngenah jelé. Nepukin ento, invéstor asing ngékadaya apang ngidang mukak alas. 

“Bapak kepala désa, jika proyék ini berhasil kita akan memperoleh keuntungan besar,” kéto raos invéstor ngrayu Jro Perbekel.

Ulian kena rayuan, Jro Perbekel nyak néken surat perjanjian tur invéstor ento ngawit magaé. Uling niskala, Ki Jrimpit ngelah keneh lakar nyetik invéstor apang kapok tur suud ngusak alas. Nanging, invéstoré dueg pesan ngaba pasikepan ané sing ada tandingané. Ki Jrimpit kalah tur ngorahin sisia-sisiané mundur. Sebet kenehné Ki Jrimpit nepukin poskoné benyah latig ulian lilig mesin. Jani Alas Arumé telah gundul sing misi apa.

Lantas, gumi Baliné ujan bales. Ulian sing ada punyan kayu sané naanang yéh di alasé, teka blabar agung ka Désa Ngalub. Liu krama désané ilang anyudang blabar. Krama désa lantas sangkep tur melihang Sekaa Léak. Krama désa precaya sekaa ento ané ngusak alas ulian pedih tekén krama désa. Jro Perbekel ngorahin krama désa nunjel umah Ki Jrimpit. Ki Jrimpit ané sing nawang apa mati katunjel. Sisia-sisiané sedih kingking nepukin guruné buka kéto. I Kaki suba ngorahang ento ulah invéstor nanging kramané tusing precaya. Sasukat ento, sekaa léak bubar tur ngalih geginan padidi-padidi.

“Naaa… ulian ento, Sekaa Léak bubar, Tu. Krama iraga nak belog-belog, nyak dogén anggona robot tekén invéstor. Yén suba alasé benyah latig buka kéto, nyén lakar pelihang? Nyama pedidi?” kéto raos I Kaki tekén Putu Nadi.

“Mihhh… pedalem sajan, Ki. Nah jani Putu lakar nuutin laksanan Kaki,” kéto pasautné Putu Nadi sambilanga nigtig tangkah.

“Lakar nglestariang alas, Tu?”.

“Ngaé Sekaa Léak jilid II,” saut Putu Nadi sambilanga malaib. 7