Hallo Boss!!

Peliatné lamur ulian penyingakané misi yéh ngembeng-ngembeng. Bucun penyingakané suba nyaléét yéh tipis. Laut, ia ngusap-usapin aji telapak limané kenawan.

“Duh déwa ratu adi kéné idup tiangé,” kéto di keneh Putu Warti ngarengkeng.

Suara musik karaoké pisagané tusing ngaénang kenehné liang. Suara gending-gendingané dadi ngempengin kuping. Mula kakéto jani anaké di banjarné. Muani-muani tua, truna, patuh jani demen makaraokéan. Ia sing ngitungang peteng lemah. Kali kéngkén ja kenehné makaraokéan jeg mamunyi suba saloné. Saloné ané anggona tusing kanggo ané biasa-biasa. Salon gedé munyiné jedar-jedur kanti tangkahé ngerudug. Sing ja ngaénang liang kenehé ningehang. Jeg mabalik ngaé bongol kupingé ningehang. Apa buin di tongosné ento misi minuman tuak misi arak. Ngangsan nyangetang pesu ajumné. Misi ngigel, misi magending, misi kaik-kaik.

Yén imaluan, ada masi anak demen magibung matuakan. Sakéwala, matuakan tusing ja ngeleng matuakan dogén. Matuakan misi magending-gending magénjékan. Gendingé demen kadingehang. Gending génjék misi malelamapahan, misi ngajum-ajum. Nyak buin yén di patuakan ada anak bajang nongosin tur kademenin tekén anaké truna matuakan ento, pih misi magending ngerayu bin. Cara Putu Warti pidan dugas mademenan ajaka kurenané, ulian rayuan di patuakan. Putu Warti nginget-ngingetang dugasné ento.

“Mé, mémé,” Gedé Bali ngaukin méméné.

Putu Warti tangkejut. Ia tusing ningeh pianakné  makaukan di sampingné. Putu Warti nolih Gedé Bali sambilanga enu ngusap-usap peningalané.

“Mé, suba Mé? Cang jani lakar majalan ka Badung,” kéto Gedé Bali ngomong tekén méméné.

Putu Warti tusing masaut. Ia mabancutan laut macelep ka kamarné. Sing makelo lantas, ia pesu ngaba amplop. Amplopé ento enjuhanga tekén Gedé Bali. Gedé Bali nyemakin amplop ané banga tekén méméné. Tusing ada munyi apa tekén méméné. Laut ia nyemak tas tur majalan ka motorné. Putu Warti nelektekang pianakané majalan mamesu uling natah umahné, majalan luas ka Badung. Putu Warti negak buin mapangsegan. Jani mara pesu elingné sengi-sengi. Yéh paningalané ngetél sing ngidang natakin. Ia ngusapin yéh paningalanné aji lengen bajuné.

“Beli, segerang ja kenehné Gedé. Jeg kakéné gati solahné jani,” Putu Warti ngajap-ajap kurnané.

Ia marasa tusing sanggup buin tekén solah pianakné. Gedé Bali pianakné Putu Warti aukud. Ulian dadi panak muani aukud, ia sayanganga makeplag tekén bapané. Apa ja idiha, setata kaisinin tekén bapané. Yén sing banga pasti suba ia ngambrés ngambul. Di kéngkéné Putu Warti sesai mauyutan ajaka kurenané ulian solahné Gedé Bali. Yén apa tagiha tusing dadi tanggehang buin mani, jeg apang jani. Cara solahné jani, ia ngidih pipis tekén méméné lakar anggona bekel ka Badung apang maan jani. Mara ibi Galungan jani Umanis Galungan, Gedé Bali nagih pipis. Méméné tundéna ngadep kalung warisan bapané.

Enu Umanis Galungan dija ada toko emas buka. Buina toko emas di kota. Jani lakar ngalih ojék, anaké ngojék tusing ada. Budi ia tundéna ngatehang, ngorahang tusing juari. Adenanga ia ka umah timpalné minum makaraokéan. Pamuputné, méméné ka réntenir, tukang gadé barang di banjarné.

Putu Warti marasa tusing ngelah pianak. Rainan mulih kadén iseng tekén méméné, ia iseng tekén timpalné. Asal suba mulih, tawanga motorné Gedé Bali magerung, énggal gati suba timpalné ngaukin.

“Hallo Bos! Pidan mulih. Mai dini suba liu timpalé kumpul ngantiang,” kéto suba timpalné ngaukin.

Tusing ngatos makelo. Ngejang tas dogén suba malaib mamesu.

“Gedé, sing kayeh malu, madaar malu, mara teka buin pesu” kéto sesai méméné ngomong.

“Nah, binsep Mé. Ngalih timpalé malu.” Tuah amonto dogén pesautné.

Yén suba pesu di timpalné, ia minum, makaraokéan kanti tengah lemeng. Suba kéto lantas lemah mara mulih. Neked jumah, ia pules makatengai di galungané. Mulih tatujoné maturan rainan Galungan ka merajan, ia tusing suba ngidaang. Sanja mara bangun, buin kaukina tekén timpalné. Yén tusing minum, ia pesu ajaka ka tongos tajén. Sabilang mulih lebian suba kakéto dogén. Kaling ké maang bekel méméné, bekel anggona padidiana suba telah.

“Mara kauikin bos dogén suba pesu, makejang pipisné pesu. Kadén saja bos sugih, dadi bos… bosor,” kéto Putu Warti ngarengkeng. Munyiné seret, pegat-pegat ulian naanang lingné.

“Beliii med suba tiang ngitungang pianaké. Tulungin ja uling kedituan entegang panaké. Bisa-bisa tiang nutug beli ulian panaké.”

Tangkahné bebekan pesan. Putu Warti ngerasang lingné sahasa kuuk-kuuk, kéwala tusing ada anak ningeh sawiréh kakaput tekén munyi musik karaoké ané ngempengang kuping banjarané. 7