Anak Sakti

Ditu ia nelebang sakancan isin kawisésané. Mula yoniné dadi anak sakti, énggal sakancan kaweruhané bakatanga. Kanti guruné, angob tekén ia. Buina ia masi pepes mayasa di tongosé tenget-tenget. Taén guruné ngorahin ngédéngang kawisésané di arepné. Béh prajani pesu ajumné. Sabilang orahina ngédéngang prajani pesuanga. Kanti orahina nyuti rupa sakancan buron. Nyidaang masi ia. Orahina dadi kijang mas masi nyidaang. Kulitné ngrédép bék misi mas. Ada ané mabalih nagih mas akéténg. Sakéwala, tusing baanga. Yén ento kidihanga, bisa gelem. “Demit masi anaké sakti ené?” kéto ngrieng timpalné ané mabalih. Buin orahina nyuti rupa apang dadi jaran ané makampid. Tusing ngitung apa-apa buin, suba nyidaang makeber, mlecat di ambarané. Makejang nuléngék mabalih di ambarané.

Mirib suba panumaya ia mapurukan, lantas mawali buin ka désané. Sayan-sayan kasub di désané, ia anak sakti. Liu masi anaké kema mapurukan apang bisa buka ia, dadi anak sakti. Sakéwala, tusing ada nyidaang buka ia. Mirib tusing karmané dadi anak sakti. Pamragat dadi anak mrasa sakti dogén. Buina mula, tusing nyak masi ia ngajahin apang patuh saktiné buka déwékné. Jejeh masi, apang tusing kalahanga. Sayan-sayan kabinawa anaké sakti totonan.

Baan saktiné, jani ia makeneh nyuti rupa dadi wenara. Saja pesan, sedek nuju dina Kajeng Kliwon Enyitan, ia magenti rupa dadi bojog. Toliha kulitné suba mabulu buka bojogé di alasé. Munyiné suba magenti. Kruak-kruék dogén, sakéwala kenehné enu buka manusa. Ditu ia ngalas, ningalin alasé. Makesiab masi ia, tepukina alasé suba tusing magoba alas buin. Tepukina abing bukité suba tusing magoba abing buin. Ngelah masi ia keneh welas asih, “Yén makejang bukit, gunung alasé buka kené sinah bencana lakar teka manian. Yéhé lakar nyenikang, guminé sayan kebus. Sinah lakar kéweh tepuk manian. Baan tresnané tekén bukit, gunung, alas lantas ia ngredana Bhathara Indra apang mesuang ujan. Saja pesan, Bhathara Indra swéca, gulemé prajani teka, tatit, kilap, kerug saling timbalin. Tusing ngitungin kudang ilehan dauh, alah téngkobang ujané tuun. Tingalina liu bukité embid krana makelo tusing maan ujan. Tingalina masi tukadé prajani gentuh buina ada kayu ané anyud. Melahné guminé dadi tis. Tatajukané lan kayu-kayuné di alasé maan siratin ujan. Ento melahné ia dadi anak sakti, nyidaang nulungin gumi.

Mrasa tekén déwékné mapitulung tekén gumi, jani buin ngredana Bhathara Indra. Tedun Bhathara Indra di arepné. Matur anaké sakti totonan ané enu magoba bojog. “Ratu Bhathara Indra, titiang nunas ring Singgih Bhathara, icénin titiang dedari duéné asiki. Singgih Ratu kocap katah madué dedari. Icénin titiang asiki manten.”

“Lakar anggon gena nagih dedari?” 

“Jagi anggén titiang somah Ratu mangda naen wenara ngantén sareng dedari.”

Bhathara Indra kenyem. “Nah, yén kéto, ené baanga dedari Nariratih adané. Jegégné buka bulan murnama. Dedariné ené gumanti kasub jegég di Kahyangan. Jani, serahang Bapa. Sakéwala, kéto, baan pinunasé enu magoba bojog. Uli jani, suud dadi manusa, lakar tetep dadi bojog.”

Makesiab anaké sakti totonan, prajani nunas ampura apang nyidaang dadi manusa buin. 7