Aptian I Bapa

Di rong tengah baléné ia negak ningalin foto let kulawargané. Ditu misi kenyeman manis somahné ané suba makelo ngalain gumi tur Wayan Sura pianak tunggalné ané banyol ngejengit dugas enu cerik. 

Kenyeman ento jani tuah kenangan. Wayan Sura ané pidan dueg, bakti tekén rerama, jani maparisolah baneh. Sesai mulih punyah, barang di umahné sakabesik ilang. Sujatiné Pan Kalér nawang, makejang suba maadep anggona meli narkoba. Pan Kalér maangsegan, ia nawang swadharmané dadi reramé tondén pragat. “Pianaké tusing dadi terus kakéné, ia patut seger!” kéto ia ngumik sakadi masamaya tekén déwék padidi. Nutur ia tekén pisagané, sagét ada pisagané ngorahin maubad ka balian. 

Saking saat nyegerang pianakné, munyin pisagané kagugu. Magenep suba orahina tekén jero balian, nanging tusing masé pianakné seger. Kanti ada anak ngorahin buin maubad ka pusat réhabilitasi. Inget lantas Pan Kalér ngelah kanténan magae di pusat réhabilitasi. Buin maniné, Pan Kalér ka umah kanténanné, Pan Dibia ané magae di lembaga réhabilitasi. Makadadua negak di ambéné sambilang ngopi. Pan Kalér nyatuang indik pianakné uling mara nawang narkoba kanti dadi pemadat. Mausaha nuturin nanging sarasa tan paguna kanti maubad ka balian.

“Pan Kalér, nyegerang pianaké tusing ja gegaén aluh, nanging iraga patut dabdab tur seleg. Boya ja tusing percaya tekén niskala, nanging anak dadi pemadat tusing gelem ulian niskala nanging ulian narkoba. Yéning sadia, lakar alihang program réhabilitasi,” kéto Pan Dibia ngemaang pajalan. Pan Kalér maanggutan, ia nawang pajalanné tusing ja aluh. 

Ri kala peteng, Wayan Sura mulih, pajalanné srandang-sréndéng. Paningalanné barak, engkahné mabo alkohol. Bapané suba ngantiang di rong tengah baléné. 

“Wayan, mai malu negak dini!” alon bapané ngorahin.

“Éngkén pa? Kenjel sajan né pa,” saut Wayan Sura sambil nengkik.

Pan Kalér nguratiang pianakné. 

“Wayan, bapa tuah ngelah pianak abesik, tuah Wayan, mémé Wayanné suba ngalahin. Tresna bapané jani tuah anggon Wayan, tusing las kenehé ningalin pianak kakéné. Benyah keneh bapane.”

Wayan Sura makenyem nyimbing. “Benyah? Bapa nawang apa tekén idup icangé?”

Pan Kalér mausaha enteg yadiastun kenehné ngangah. “Bapa mula tusing nawang makejang. Nanging bapa nawang, pianak bapané patut tulungin. Bapa lakar nulungin pianak, kénkén ja carané.”

“Kréyot.......” Semengan Pan Kalér ngampakang jelanan kamar pianakné, sayaga lakar luas. Dinané ento dina kapertama pianakné maubad ka pusat réhabilitasi. Kipak-kipek paling Pan Kaler ningalin kamar pianakné. Tusing ada Wayan Sura di kamarné. Kamarné makacakan, jelanan lemariné maampakang, panganggoné maadukan. Uyut Pan Kalér ngaukin pianakné. Alih di kamar mandi, di paon, di teba, di pisaga masih tusing ada. “Kija pianaké, nyén ajaké malaib, motorné ada jumah?”

 

“Pan Kalér, Pan Kalér, polisi telépon, polisi telépon...!” kéto pisagané ngorahin. 

Tusing suud-suud Pan Kalér nunas ica apang pinakné bakatanga selamet. “Ratu Bhatara, titiang tusing madué sira, somah sampun ngalahin, mangkin titiang nunas mangda pianak tiangé selamet,” acepan ento tusing suud kaucapang. 

Magerung madingehan munyin mobil diwang umahné, ngéncolang ia nyagjagin. Ngetél yéh paningalan Pan Kalér ri kala pintu mobil polisi maampakang. Ada pianakné ditu. Polisi ngorahang Wayan Sura bakatanga di jalan. Maan ia nglawan polisi, tusing nyak atehang mulih sawiréh jejeh maubad. Polisi ané nulungin ngatehin Wayan Sura maubad ka pusat réhabilitasi.

Pajalanné maubad lantang tur ngemedin. Wayan Sura maan nulak ri kala kaatehin ka pusat réhabilitasi. Sesai ia malaib, memedih tur melihin bapanné tekén rasa sengsara ané ia rasaang. 

Nanging Pan Kalér tusing nyerah tekén kahanané ento. Yéning pianakné malaib, saat ia nguber. Ri kala pianakné pedih, ia mautsaha enteg. Sabilang peteng, ia mabakti, nunas ica majeng Sang Hyang Widhi apang Ida ngicén pamargi. 

Enem bulan suba majalan, kahanané sayan ngeluungan. Sakabedik, Wayan Sura suba sadia ngorta. Di tongos réhabilitasi ia kacunduk tekén anak ané manasib patuh. Ia ningehang orta timpalné, minehin di guminé ia tusing padidian. Pan Kalér sesai nelokin pianakné, magagapan dedaaran dedemenan pianakné, nyatuang kahanan désané, magenep ortané pesu kangin kauh anggon nglimurang manah pianakné.

“Bapa, Wayan meled mulih,” kéto tetagih Wayan Sura, ngembeng yéh paningalanné ngaptiang.

Pan Kalér makenyem, yéh paningalanné melusin pipiné. “Yén suba seken seger, lan mulih, umahé apang ramé buin.”

Atiban suba liwat, di rong tengah baléné, di tongos ané patuh, Pan Kalér ajak Wayan Sura negak bareng-bareng. Di méjané, matumpuk buku-buku Wayan Sura dugas enu kuliah. Jani Wayan Sura suba seger, kuliahné katugtugin ané pidan taén pegat. 

“Suksma bapa tusing taén ngambulin Wayan, tusing taén ngutang ri kala sengsara, sarat sajan apang seger,” kéto Wayan Sura. 

Pan Kalér ngelut pianakné. “Cening pinaka sentir, diapin remrem, nanging bapa nawang lakar masunar buin, yén seken nguratiang. Buin pidan Wayan lakar dadi jadma maguna. Maguna di ragan Wayanné, bapa, kulawarga, désa, miwah maguna tekén anak lianan.”

Petengé ento, ujan bales buin ngrudug, nanging di kenehné ada rasa anget tur trepti. 7